Ռուս երգչուհի, դերասանուհի Լյուդմիլա Սենչինան մինչև կյանքի վերջին օրերը պահում էր «Ես քեզ սիրում եմ» գրությամբ ամուսնական մատանին, որը նրա համար Հայաստանից պատվիրել էր «Ցվետի» խմբի առաջնորդ Ստաս Նամինը: Այս մասին գրված է «Կոմսոմոլսկայա պրավդա» թերթում։

Սենչինան Նամինի հետ ծանոթացել է առաջին ամուսնուց բաժանվելուց հետո։ Նրանք հանդիպել են 1980 թվականին Ալեքսանդր Պախմուտովայի համերգի ժամանակ։ Զրույցի են բռնվել հանդերձարանում, հանրահայտ ու գրավիչ Ստասն առաջարկել է համերգից հետո շրջել ավտոմեքենայով։ Սենչինան համաձայնել է։

«Ստասն անմիջապես մտերիմ դարձավ, մենք կարող էին երկու ընկերուհիների պես մինչև առավոտվա 8-ը զրուցել խոհանոցում։ Առողջ ապրելակերպ ունեինք` առանց ծխախոտի, առանց ոգելից խմիչքների, առանց մսի»,-ժամանակին պատմել է Սենչինան։

Լյուդայի և Ստասի հարաբերությունները սկսել են վատանալ, երբ Նամինը ստանձնել է նրա պրոդյուսերությունը։ Ստասը «կառավարել» է նրա կարիերան. կազմել է երգացանկը, հյուրախաղեր է կազմակերպել, ընտրել երաժիշտներին։ Դա սկսել է նյարդայնացնել Սենչինային, և նա Իգոր Տալկովին է հրավիրել երաժշտական ղեկավար աշխատելու։

Շատերը կարծել են, որ Սենչինան և Տալկովը սիրավեպ ունեն, բայց երգչուհին հերքել է։ Նրանք իսկապես շատ ժամանակ են անցկացրել միասին (նույնիսկ առավոտյան մարմնամարզությամբ են զբաղվել և գիշերը լողացել ծովում), բայց հարաբերությունները պլատոնիկ են եղել։

«Իգորն իմ «ընկերուհին» էր։ Նրա շնորհիվ ես առաջին անգամ լրջորեն սկսեցի զբաղվել սպորտով և 75 կգ-ից հասա 54 կգ-ի։ Մենք բաժանվեցինք, որովհետև նա սիրում էր ինձ»,-խոստովանել է Սենչինան։

Տալկովը շուտով հեռացել է և սկսել է մենահամերգներ տալ, այդպես էլ ավարտվել են նրանց հարաբերությունները։ Ստասը շատ է խանդել կնոջը։ Նրանց ամուսնությունը փլուզվել է 90-ականների սկզբին։

«Ստասը շատ խանդոտ էր ինչպես մարդկային, այնպես էլ ստեղծագործական առումով։ Նա շատերին հեռացրեց ինձանից։ Ստասն էր որոշում` ում հետ շփվեմ, ում հետ` ոչ։ Ասում էր` ինչի՞դ են պետք հյուրախաղերը, գումա՞ր է պետք։ Այդ թեմայով էլ վիճում էինք»,- ասել է երգչուհին։

Նա խոստովանել է, որ միմյանց չեն դավաճանել, սիրավեպեր չեն ունեցել, պարզապես հարաբերությունները փակուղի են մտել։ Ստասն իր հետաքրքրություններն է ունեցել, Սենչինան` իր։ Նույնիսկ տանը ընդհանուր ոչինչ չեն ունեցել, թեև Նամինը երազել է մեծ տան մասին, որի բակում հսկայական ծառ կլինի, տակն էլ` մեծ սեղան, որի շուրջ նստած կլինեն ամբողջ ընտանիքով, ընկերների հետ, իսկ մոտ 15 երեխաներ կվազվզեն բակում։

Նամինից բաժանվելուց հետո Սենչինան ամուսնացել է իր համերգային տնօրենի` Վլադիմիր Անդրեևի հետ։

Լյուդմիլա Սենչինան մահացել է այս տարվա հունվարի 25-ին։ Նա 68 տարեկան էր։

Աղբյուրը՝ armeniasputnik.am