Լրագրողների հետ հանդիպման ժամանակ ՀՀԿ խմբակցության պատգամավոր Հայկ Սանոսյանը պատասխանելով հարցին, թե ինչպես կմեկնաբանի այն լուրերը, որ ինքը հովանավորվում է Վրաստանի կառավարության կողմից և Ջավախքում էլ  կալանավայր պիտի կառուցի՝ ասել է, որ եթե ինքը շատ սերտ կապեր ունի Ջավախքի իշխանությունների հետ, չի նշանակում, որ հակված է բանտ կառուցելու։

 -Վրաստանում այդպիսի ծրագիր է եղել, որ 5 կալանավայրեր կառուցվեն, և այնպես է ստացվել, որ այդ կալանավայրի կառուցման աշխատանքների մրցույթը շահել է իմ եղբոր կազմակերպությունը, որն այսօր լուրջ ծրագրեր իրականացնող միակ կազմակերպությունն է Ջավախքում. գազաֆիկացում է իրականացնում, ֆաբրիկա է բացել 500 աշխատատեղով, և դրան էլ զուգահեռ փորձում էինք այդ բանտի կառուցման ծրագիրն իրականացնել, սակայն երբ կալանավորների թիվը պակասեց, դրա անհրաժեշտությունն այլևս չեղավ և չսարքվեց,-ասել է նա։

Ըստ Հայկ Սանոսյանի՝ եթե կալանավայրը սարքվեր էլ, բնակչության համար ոչ մի վտանգ չէր ներկայացնելու։

-Դա ամերիկյան մոդելի մի կալանավայր պետք է լիներ։ Այդ լուրեր տարածողները երազում են, որ վրացական ամենացածր չինովնիկի հետ գոնե բարևեն։ Չեն կարողանում, դրա համար նման լուրեր են տարածում։ Ես վրացական իշխանությունների հետ բարիդրացիական հարաբերություններ ունեմ և դա օգտագործում եմ հօգուտ իմ ժողովրդի,-հավելել է նա։

Մեր ունեցած տեղեկություններով, «Վիրահայերի միասնություն» կազմակերպությունը, որի անդամ է նաև Հայկ Սանոսյանը, հովանավորվում է վրացական հատուկ ծառայությունների կողմից և վերջիններիս հաջողվել է ներդնել սեփական կադրերին ՀՀ խորհրդարանի իշխող խմբակցության կազմում։ Հայկսանոսյանների միջոցով վրացական իշխանությունները Ջավախքում իրականացնում են այնպիսի քաղաքականություն, որ հիմա նույնիսկ հայկական թերթերն ու գրքերը մեծ դժվարությամբ են հասնում Ջավախք։

7or.am