Այսօր ԱԺ ճեպազրույցների ժամանակ ՀՅ Դաշնակցություն խմբակցության քարտուղար Արտյուշա Շահբազյանին լրագրողները հարցրել են, թե ինչպես կմեկնաբանի ԱԺ «Ժառանգություն» խմբակցության ղեկավար Ստեփան Սաֆարյանի այն հայտարարությունը, որ Դաշնակցության հետ այլևս անհնար է իրենց համագործակցությունը և Ժառանգությունը Դաշնակցությանը բարի ճանապարհ է մաղթում:

-Անշուշտ մեծ ողբերգություն չի լինի, եթե յուրաքանչյուրս գնա իր ճանապարհով, մանավանդ, որ մենք նաև մեծ բան չենք ստեղծել, որ մեծ բան քանդենք: Մենք համախմբվել ենք ընդամենը մե՛կ խնդրի շուրջ համագործակցելու համար,- ի պատասխան ասել է Ա. Շահբազյանը.

-Համենայն դեպս, կցանկանայի իսկապես պաշտոնական խոսք լսել, որովհետև այնուամենայնիվ ես հույս ունեմ, որ մենք կարող ենք շարունակել, մանավանդ, որ առաջիկայում քննարկելիք խնդիրներ ունենք և գործողությունների ծրագիր պետք է մեր գործընկերների հետ ճշգրտենք: Այնպես, որ անելիք կա, իսկ եթե որևէ մեկն այս ճանապարհին կորոշի, որ ինքն ավելի ճիշտ կամ խելացի ուղի պետք է ընտրի, գործելակերպ է հստակեցրել, բարի՛ ճանապարհ, կցանկանանք մեծ հաջողություններ, նույնիսկ կմիանանք նրանց, ովքեր որ իսկապես ավելի խելոք ճանապարհով կգնան:

7or.am