-Վերջին քննադատությունը, որ վերաբերում էր ԵԱՀԿ Միսկի խմբին, գալիս էր Թուրքիայից, և հետաքրքրական է, որ եթե Թուրքիան ցանկանում է մեծ դեր ունենալ և ներգրավվել ՄԽ-ում, Ղարաբաղի հետ կապված հարցերում վերջին քննադատությունն ու վիրավորանքները փակեցին այդ դուռը Թուրքիայի համար,- «Հայացք» ակումբում ասել է ՌԱՀՀԿ տնօրեն Ռիչարդ Կիրակոսյանը։

Անդրադառնալով ԱՄՆ պետքարտուղարի առաջին տեղակալի Հայաստան կատարած այցին՝ Ռ.Կիրակոսյանն ասել է, որ Ջեյմս Ստայնբերգը շատ լավ ծանոթ է տարածաշրջանին և շատ խելացի է։ Նա նշել է, որ Ստայնբերգի այցելությունն ուղղակի հերթական, գործնական այցելություն է. «Եթե նայենք նրա գրաֆիկը, կտեսնենք, որ նա հիմա Երևանում է, այնուհետև գնալու է Թիֆլիս, բայց ոչ Ադրբեջան։ Սա ցույց է տալիս, որ նրա օրակարգը և առաքելությունը Լեռնային Ղարաբաղին չեն վերաբերում»։

Նրա ուղերձը Թուրքիային այն է, որ Թուրքիան արագացնի գործընթացը։ Նա նաև հիշեցնող ուղերձ ուներ Թուրքիային, որ սպասումները միայն նրանից են։ Վերջին ուղերձը, որը, Ռ.Կիրակոսյանի կարծիքով ոչ այնքան պաշտոնական է, հետևյալն է՝ Թուրքիան սխալ կգործի, եթե լինի առաջին երկիրը, որ կջղայնացնի նախագահ Օբամային։

7or.am