Հայտնի վրացի հեռուստահաղորդավար Շալվա Ռամիշվիլին պետք է իր նախկին աշխատակից Թաթիա Սամխարաձեին 2 հազար լարի (մոտ 775 դոլար) վճարի որպես բարոյական վնասի փոխհատուցում:

Թաթիա Սամխարաձեն մեղադրում էր Ռամիշվիլիին սեռական ոտնձգության համար:

Չնայած որ դատարանը մասնակիորեն բավարարել է Սամխարաձեի հայցը (Ռամիշվիլիին պարտավորեցնելով փոխհատուցել միայն բարոյական, այլ ոչ թե նյութական վնասը), վրացի իրավապաշտպաններն այս գործն աննախադեպ են համարում, քանի որ, նրանց խոսքով, դատարանը հաստատել է սեռական ոտնձգության փաստը:

«Սափարի» միության ղեկավար, կանանց իրավունքների պաշտպան Բայա Պատարայան հույս ունի, որ «այս գործը նախադեպ կդառնա, և սեռական ոտնձգությունների զոհ այլ կանայք չեն վախենա բռնարարին դատի տալ»:

Դատարանի որոշումից գոհ է նաև Թաթիա Սամխարաձեն: «Ամենակարևորն այն է, որ դատարանը հաստատել է սեռական ոտնձգության փասն ու պարտավորեցրել բարոյական փոխհատուցում կատարել։ Դա, իմ կարծիքով, շատ կարևոր է բոլոր նրանց համար, ովքեր նման խնդիր են ունեցել»,-ասել է Սամխարաձեն on.ge պարբերականին:

Իր կողմից, Շալվա Ռամիշվիլին պնդում է, որ այդ ինքն է դատը շահել, քանի որ «այնտեղ խոսք չի եղել ոչ խտրականության, ոչ ոտնձգության մասին»:

Դատավճռի մոտիվացիոն մասը դեռևս հրապարակված չէ:

2015թ-ին «Իմեդի» հեռուստաընկերության աշխատակից 25-ամյա Թաթիա Սամխարաձեն իր ղեկավար, հայտնի և ազդեցիկ հեռուստահաղորդավար Շալվա Ռամիշվիլիին մեղադրել է սեռական ոտնձգության համար և դիմել դատարան: Ռամիշվիլին հերքում էր մեղադրանքը:

Թաթիա Սամխարաձեն Վրաստանում առաջին կինն է, որը դատի է տվել իր ղեկավարին սեռական ոտնձգության համար:

Աղբյուրը՝ jam-news.net