ԱԺ ՕԵԿ խմբակցության ղեկավար Հեղինե Բիշարյանը խորհրդարանական հարցուպատասխանի ընթացքում հարց է ուղղել կառավարությանը՝ «Սոչիում ՌԴ արտգործնախարար Լավրովի՝ նախաբանի համաձայնեցման հետ կապված հայտարարությունից հետո ադրբեջանցիները պնդում են, որ բանակցությունները մոտենում են ավարտին. արդյոք դա համապատասխանո՞ւմ է ճշմարտությանը»։

-Իհարկե ոչ,-տեղից արձագանքել է ԱԺ նախագահ Հովիկ Աբրահամյանը, ապա հարցին պատասխանելու համար ամբիոն հրավիրել արտգործնախարար Էդվարդ Նալբանդյանին.

-Ռուսաստանի արտաքին գործերի նախարար Ս. Լավրովի հայտարարությունն այն մասին, որ ընդհանուր ըմբռնում կա նախաբանի վերաբերյալ, չեմ կարծում, որ որևէ մեկին հնարավորություն է տալիս եզրակացության գալ, որ արդեն ավարտին ենք մոտենում,-հայտարարել է ՀՀ արտգործնախարարը։

-Ի՞նչ նախաբանի մասին է խոսքը,-հարցրել է Հ. Բիշարյանը։

-Եթե, իհարկե, կողմերի միջև պայմանավորվածություն լիներ հրապարակել նախաբանի մանրամասները, ապա դա կարվեր։ Բայց ես կարող եմ ասել, որ այդ նախաբանը համահունչ է, օրինակ, Աթենքում կայացած 56 անդամ երկրների արտգործնախարարների հայտարարությանը, որտեղ առաջին անգամ ամրագրվեց նաև ինքնորոշման իրավունքը,-պատասխանել է Է. Նալբանդյանը։

7or.am