Միացյալ Նահանգները պատժամիջոցներ է սահմանել Հյուսիսային Կորեայի բալիստիկ հրթիռային ծրագրով զբաղվող երկու պաշտոնյաների նկատմամբ:

ԱՄՆ-ի ֆինանսների նախարարությունը տարածել է հայտարարություն, ուր նշում է, որ պաշտոնյաներ Կիմ Ջոնգ Սինքն ու Ռի Փյոնգ Չոլը հանդիսանում են Հյուսիսային Կորեայի հրթիռային ծրագրի կարևոր դեմքեր: Որոշումը կայացվել է Փհենյանի վրա ճնշումն ուժեղացնելու ամերիկյան քաղաքականության համատեքստում:

Հայտնի է, որ վերոհիշյալ պաշտոնյաները երկրի առաջնորդ Կիմ Ջոնգ Ունի մտերիմներն են և հանդիսանում են զենքի գծով Հյուսիսային Կորեայի առաջատար մասնագետներ: Ըստ ԱՄՆ-ի ֆինանսների նախարարության, Կիմ Ջոնգ Սինքը մասնագիտացած է հրթիռների վառելիքի արդյունավետ օգտագործման հարցում, իսկ Ռի Փյոնգ Չոլն աշխատում է միջմայրցամաքային բալիստիկ հրթիռների ծրագրի վրա:

Սակայն, սահմանված պատժամիջոցներն ունեն ավելի խորհրդանշական նշանակություն, քանի որ արգելում են Հյուսիսային Կորեայի պաշտոնյաներին ձեռք բերել ունեցվածք ամերիկյան վերահսկողության տակ գտնվող տարածքում, ինչպես նաև արգելում են ԱՄՆ-ի քաղաքացիներին որևէ գործունեություն ծավալել այդ անձանց հետ:

Իր հերթին Ռուսաստանը կրկին հանդես է եկել Վաշինգտոնի և Փհենյանի միջև միջնորդական առաքելություն իրականացնելու առաջարկով: Ի պատասխան, ԱՄՆ-ի պետքարտուղարությունն արձագանքել է, որ ամերիկյան կողմն ունի տարբեր միջոցներ Հյուսիսային Կորեայի հետ ուղիղ կապ հաստատելու համար, որը կախված է Փհենյանի քաղաքական կուրսի փոփոխության հետ:

Միևնուն ժամանակ ՄԱԿ-ի Անվտանգության խորհուրդն ընդունել է նոր բանաձև, որով սահմանափակել է Փհենյանի կողմից ներմուծվող վառելիքի չափը և ավելի խիստ վերահսկողություն է սահմանել այն առևտրային նավերի նկատմամբ, որոնց նկատմամբ առաջ կգան դեպի Հյուսիսային Կորեա արգելված ապրանքներ ներմուծելու կասկածներ։

Աղբյուրը՝ Ամերիկայի ձայն