Ամստերդամի «Այաքսի» նախկին կիսապաշտպան Աբդելհակ Նուրին, որը 2017 թվականի ամռանը ուղեղի անդառնալի վնասվածք է ստացել, գիտակցության նշաններ է ցույց տվել: Այս մասին հայտնում է «The Mirror»-ը:

Աղբյուրի փոխանցմամբ, 20-ամյա ֆուտբոլիստը ժպտացել է, երբ բժիշկներն իր կրծքավանդակի վրա ֆուտբոլային գնդակ են դրել: Մինչ այդ, բժիշկները նույն գործողությունը կատարել են նաև այլ առարկաների միջոցով, սակայն նա ոչ մի կերպ չի արձագանքել:

Նշվում է, որ ֆուտբոլիստի հարազատներին սա լավատեսություն է հաղորդել.

«Հաճելի է, որ նա առաջվա պես սիրում է ֆուտբոլը և ուժեղ է մնում, բայց ցավալի է, որ նա այլևս երբեք չի կարողանա խաղալ»,- ասել է Նուրիի հայրը:

Հիշեցնենք` հուլիսի 8-ին Նուրին ուղղաթիռով տեղափոխվել է հիվանդանոց այն բանից հետո, երբ գերմանական «Վերդերի» հետ ընկերական խաղի ժամանակ կորցրել է գիտակցությունը:

Ի սկզբանե, «Այաքսում» հայտնում էին, որ ֆուտբոլիստի վիճակը կայուն է և կյանքին որևէ վտանգ չի սպառնում, բայց հուլիսի 13-ին հայտնի դարձավ, որ երիտասարդ ֆուտբոլիստն ուղեղի անդառնալի վնասվածք է ստացել: Այդ ժամանակից ի վեր նա գտնվում է կոմայում:

Աղբյուրը՝ armsport.am