Հայտնի վերլուծաբաններից մեկն ասել է, թե հնարավոր է, որ ղարաբաղյան հակամարտության խաղաղ կարգավորման գործընթացը դուրս գա վերահսկողությունից, և մոտ ապագայում պատերազմ լինի։ Մեկնաբանելով այս տեսակետը՝ «Հայ ազգային կոնգրեսի» համակարգող Լևոն Զուրաբյանն ասել է.

-Դա կարելի է համարել հավանական սցենարներից մեկը։ Իսկապես ռազմաքաղաքական բալանսը փոխվում է հօգուտ Ադրբեջանի, և ռազմական լուծման հնարավորության հետ կապված լարվածությունն աճում է։ Դա ոչ մի դեպքում բացառել չի կարելի։

Զուրաբյանն ասել է, թե այն հանգամանքը, որ այսօր ռեժիմը գնում է զիջումների, հետևանք է փոխված ռազմաքաղաքական բալանսի։

«Հնարավոր պատերազմական գործողությունների դեպքում Կոնգրեսն իրեն ինչպե՞ս կդրսևորի» հարցին Լ. Զուրաբյանը պատասխանել է.

-Ձեր հարցի պատասխանը տվել է Լևոն Տեր-Պետրոսյանը 2008թ. մայիսի 2-ի իր ելույթում, երբ ասել է, որ պատերազմի դեպքում ինքն առաջինը կոչ կանի, որ բոլորը լծվեն համաժողովրդական պատերազմի ծրագրին։ Այնուամենայնիվ, կներեք, մենք պատասխանատու քաղաքական ուժ ենք, մեզ համար առաջինն ազգային և պետական շահերն են, և ինքներս էլ կլծվենք պատերազմական ջանքերին։

Այդուամենայնիվ, ըստ Լ. Զուրաբյանի, ինչ հանցագործ էլ լինի «ռեժիմի» ղեկավարը, պատերազմի ընթացքում վեճերն անընդունելի են.

-Բայց, բնականաբար, պատերազմից հետո այդ հարցերը նորից կդրվեն և ավելի ծայրահեղ ձևով։

7or.am