Ցմահ բանտարկյալ, ոստիկանության նախկին գնդապետ-լեյտենանտ Հաջի Մամեդովն ինքնասպանություն է գործել Բաքվի բանտային հիվանդանոցում: Առաջնային վարկածի համաձայն՝ Մամեդովը կախվել է հիվանդասենյակում՝ օգտագործելով սավանը:

Հաջի Մամեդովն աշխատում էր Ադրբեջանի ՆԳՆ քրեական հետախուզության գլխավոր վարչությունում: Մամեդովն ու ևս 26 մարդ էր ձերբակալվել 2015թ-ին ազգային անվտանգության նախարարության անցկացրած «Սև գոտի» գործողության արդյունքում: Որպես հանցավոր խմբավորման ղեկավար՝ Մամեդովը մեղադրվել է Քրեական օրենսգրքի 80 հոդվածով, այդ թվում՝ սպանություն, մարդկանց առևանգում, շանտաժ, և խմբի մնացած 7 անդամների հետ միասին ցմահ ազատազրկման էր դատապարտվել:

Երկու տարի առաջ Մամեդովը դիմել էր նախագահ Իլհամ Ալիևին՝ նոր հետաքննություն սկսելու թույլտվություն տալու խնդրանքով: Ինչպես հաղորդել է դատապարտյալի քույր Արիֆա Մամեդովան, ազգային անվտանգության նախկին նախարար Էլդար Մահմուդովը ճնշում էր գործադրում Մամեդովի վրա և արգելում դատարանում գործի կարևոր կողմեր բացահայտել: Սակայն Մահմուդովին աշխատանքից ազատելուց և ազգային անվտանգության նախարարության լուծարումից հետո Մամեդովի մոտ հույս է ծագել, որ գործը կվերանայվի, գրում է minval.az-ը:

Այդ կապակցությամբ դատապարտյալն անգամ ցանկացել է հանդիպել կտտանքների դեմ կոմիտեի ղեկավար Էլչին Բեհբուդովի հետ և նրան կարևոր բան պատմել, սակայն չի հասցրել, իրավապաշտպանը մահացել է:

Դեպքի վայրում դատաբժշկական փորձագետների մասնակցությամբ փորձաքննություն է անցկացվել: Հանգուցյալի բանտախցի խուզարկման ժամանակ գրություն է հայտնաբերվել, որում նա հարազատներից և այն հաստատության աշխատակիցներից, որտեղ ինքը գտնվում էր, ներողություն է խնդրում և նշում, որ ոչ ոքի հանդեպ չարացած չէ:

Աղբյուրը՝ jam-news.net