Նոյեմբերի 15-ին Արցախում արձանագրված երկրաշարժի հետևանքով Արցախում տուժածներ և ավերածություններ չեն եղել: Այս մասին «Արցախպրես»-ին հայտնել են ԱՀ ԱԻՊԾ մամլո ծառայությունից:

Աղբյուրի հաղորդմամբ՝ Ստեփանակերտում երկրաշարժը զգացվել է 4-5 բալ ուժգնությամբ։

Ինչպես ավելի վաղ տեղեկացրել էինք, սույն թվականի նոյեմբերի 15-ին, տեղական ժամանակով ժամը 23:48-ին (Գրինվիչի ժամանակով` 19:48-ին) ՀՀ ԱԻՆ Սեյսմիկ պաշտպանության ծառայության սեյսմոլոգիական ցանցի կողմից գրանցվել է հյուսիսային լայնության 40.150 և արևելյան երկայնության 47.100 աշխարհագրական կոորդինատներով (Ադրբեջան, Մինգեչաուր քաղաքից 68 կմ հարավ), օջախի 10 կմխորությամբ, 5.3 մագնիտուդով երկրաշարժ:

Ստորգետնյա ցնցման ուժգնությունը էպիկենտրոնում կազմել է 7 բալ:

Երկրաշարժի էպիկենտրոնը գտնվում է ՀՀ պետական սահմանից 79 կմ հեռավորության վրա:

Երկրաշարժը զգացվել է Հայաստանի Հանրապետության գրեթե ողջ տարածքում և Արցախի Հանրապետությունում՝ 2-3 և 3-4 բալ ուժգնությամբ:

7or.am