ՀՀ կառավարությունն իր երկու որոշմամբ հաստատել է ՀՀ բույսերի եւ ՀՀ կենդանիների Կարմիր գրքերը։ Այժմ Հայաստանում գործում են 1989թ. հրատարակված Կարմիր գրքերը, որոնցում ընդգրկված են 387 տեսակի հազվագյուտ եւ անհետացման վտանգված անոթավոր բույսեր եւ 99 տեսակի հազվագյուտ եւ անհետացման վտանգված վայրի ողնաշարավոր կենդանիներ։ Կարմիր գրքերի երկրորդ հրատարակությունը բովանդակում է 463 բարձրակարգ բուսատեսակներ եւ 155 տեսակի անողնաշարավոր եւ նույնքան էլ ողնաշարավոր կենդանիներ։ Որոշումների ընդունումը կնպաստի գիտականորեն հիմնավորված հատուկ միջոցառումների մշակման եւ իրագործման միջոցով կենսաբազմազանության արդյունավետ պահպանության եւ վերարտադրության բարելավմանը, Կարմիր գրքերում ընդգրկված տեսակների վերահսկողության ապահովմանը եւ դրանց նկատմամբ անօրինական գործունեության կրճատմանը, ինչպես նաեւ այդ տեսակների վերաբերյալ տեղեկատվության տարածմանը եւ բնակչության իրազեկության բարձրացմանը։