Կնոջն ամուսնական անհավատարմության մեջ կասկածելու և նրան դաժանորեն սպանելու համար 43-ամյա ամուսինը դատապարտվեց 9 տարի ժամկետով ազատազրկման:

Արմավիրի մարզի ընդհանուր իրավասության դատարանը՝ նախագահությամբ Արթուր Ադամյանի, Արթուր Մելիքսեթյանին մեղավոր ճանաչեց ՀՀ քրեական օրենսգրքի 104-րդ հոդվածի 1-ին մասով, իսկ որպես պատժի սկիզբ հաշվեց՝ 2016թ. սեպտեմբերի 20-ը՝ նրան արգելանքի վերցնելու պահից:

Ըստ մեղադրանքի՝ Արթուր Մելիքսեթյանը 19-09-2016թ. ժամը 22:00-ի սահմաններում, կնոջ` Նարինե Դանիելյանի հետ իր կողմից վարվող «Ֆորդ Տրանզիտ» մակնիշի ավտոմեքենայով Արմավիրի մարզի Զարթոնք գյուղից դեպի Ակնալիճ գյուղի ուղղությամբ ընթանալիս խանդի հողի վրա, կնոջը կասկածելով ամուսնական անհավատարմության մեջ, վիճաբանել է վերջինիս հետ, որի ընթացքում նախ ավտոմեքենայի մեջ, ապա ավտոմեքենային հարակից դաշտամիջյան հատվածում ծեծի է ենթարկել Ն.Դանիելյանին, որի ընթացքում վերջինիս պարանոցը սեղմելով շնչահեղձ անելու եղանակով դիտավորությամբ կյանքից զրկել է նրան:

Արթուր Մելիքսեթյանը և Նարինե Դանիելյանը համատեղ ամուսնական կյանքի ընթացքում ունեցել են 3 երեխա, սակայն, ըստ հրապարակված դատական ակտի, նրանց ընտանիքում հաճախակի են եղել վիճաբանություններ և կինը պարբերաբար բռնության է ենթարկվել ամուսնու կողմից:

Նախաքննության ընթացքում Արթուր Մելիքսեթյանն իրեն մեղավոր չի ճանաչել, իսկ դատաքննության ընթացքում մասնակի է իրեն մեղավոր ճանաչել և ցուցմունք տվել, որ կինն անչափահաս էր, երբ ամուսնացել են: Համատեղ կյանքի ընթացքում իրենք հաճախակի էին վիճել, իսկ դեպքի օրը՝ առավոտյան, կնոջ հետ երեխային տարել են մանկապարտեզ, որից հետո գնացել են Էրեբունի փողոցի «Յունիբանկ»՝ իրենց վարկային գործերով:

Օրվա ընթացքում գնացել են իրենց աճեցրած բերքը փոխանակելու, իսկ ճանապարհին ավտոմեքենան խափանվել է և նորոգելու ժամանակ նկատել է, որ կնոջ հեռախոսին զանգեր են ստացվել և երբ հարցրել է, թե ով է զանգահարում՝ ասել է, որ երեխաներն են, սակայն երբ արդեն մեքենայի տակից դուրս է եկել, կրկին հեռախոսազանգ է ստացվել, և ինքը կնոջն ասել է, որ հեռախոսը տա, որպեսզի ինքը խոսի: Կինը հեռախոսն անջատել է և չի տվել, որ ինքը խոսի: Ինքն այդ ժամանակ կնոջն ասել է, որ իր մեջքը թափ տա, որպեսզ ինքը նստի մեքենան, սակայն կինը պատասխանել է. «Ինքդ թափ տուր»: Երբ շորերն է թափ տալիս եղել, նկատել է, որ կինը հեռախոսով փորձել է ինչ-որ բան անել: Իր այն հարցին, թե ինչ է անում, կինը պատասխանել է, թե սիրածն է: Ինքն այդպիսի պատասխանի չի սպասել ու անակնկալի գալով՝ ապտակել է նրան և ասել, թե ինչպես է խոսում: Ապտակից հետո կինը վերացական սեռական բնույթի հայհոյանք է հնչեցրել, որից հետո ինքը մեկ անգամ էլ է ապտակել:

Դրանից հետո կինն սկսել է ոտքերով և ձեռքերով իրեն հարվածել և գոռալով ասել, որ ինքը նրան թույլ տա իջնի, գնա: Քանի որ այդ ժամանակ մեքենաներ են անցուդարձ արել, ինքը ձեռքի ափով կնոջ բերանը փակել է, որ նա լռի: Կինն այդ ժամանակ կծել է իր ձախ ձեռքի ցուցամատը և ինքը ձեռքը քաշելով՝ մի երկու հատ էլ է խփել: Դրանից հետո կինն ուզել է մեքենայից իջնել, բայց ինքն ասել է, որ հանգստանա, նոր իջնի, հետո կնոջ ձեռքից բռնած՝ ասել է, որ մեքենայից իջնի: Մեքենայից իջնելուց հետո կինն ասել է, որ իրենից բաժանվում և գնում է ու որ ինչպես ուզի, այնպես կանի: Կինը, ագրեսիվ շարժումներ անելով՝ ասել է, որ գնում է, իսկ ինքը, նրա շորերից քաշելով ու մի քանի անգամ ձեռքերով հարվածելով, փորձել է թույլ չտալ, որ հեռանա:

Ըստ ամբաստանյալի ցուցմունքի՝ իրար քաշքշելու ժամանակ երկուսով վայր են ընկել խողովակից դեպի ճանապարհ ընկած հատվածում, որից հետո կինը գետնից բարձրանալով՝ խողովակից անցել է այն կողմ՝ դեպի ջրատարը: Ինքը նույնպես անցել է այդ կողմ: Այդ ժամանակ կինն ասել է, որ նրան թողնի, որովհետև աչքը չի տեսնում: Ինքը տեսնելով, որ կնոջ աչքը արյունոտ է՝ ասել է, որ գնան մեքենայի մոտ, աչքը լվանան և տեսնեն, թե ինչ է պատահել: Այդ ժամանակ կինը կանգնելով հրել է իրեն, ինքը ետ քայլ անելով՝ ընկել է ջրատարը: Կինը նույնպես ընկել է ջրատարը: Ջրատարի մեջ տեսնելով, որ կնոջ մազերը փաթաթվել են ծառերի ճյուղերի մեջ, ու նա անկանոն շարժումներ է կատարում՝ մոտեցել է նրան, փորձել է մազերն առանձնացնել ճյուղերից և փրկել նրան:

Ահագին ջրի մեջ քաշելով՝ մի կերպ կնոջը ջրից դուրս է հանել ափ և զգացել է, որ նա շարժում չի անում: Կնոջը պառկեցրել է դեմքով դեպի գետին և մտածելով, որ ջուր կուլ տված կլինի՝ փորից մի քանի անգամ սեղմել է: Տեսնելով, որ ոչ մի փոփոխություն չկա՝ ծնկած մնացել է նրա կողքին: Մի քանի վայրկյան անց լսել է իր մեքենայի ազդանշանի ձայնը և վազել է իր մեքենայի մոտ: Այնտեղ իրեն անծանոթ մարդիկ են եղել, ովքեր հարցրել են, թե ինչով կարող են օգնել: Ինքն ասել է, որ շտապօգնություն կանչեն, որովհետև կինը ջրատարում խեղդվել է:

Ամբաստանյալը նաև նշել է, որ ինքը կնոջը ծեծի ենթարկել է, բայց սպանելու դիտավորություն չի ունեցել, միայն փորձել է մազերը ճյուղերից առանձնացնել և ջրից դուրս հանելով՝ փրկել:
Միևնույն ժամանակ ամբաստանյալը նաև հայտնել է, որ իրեն մեղավոր չի ճանաչում կնոջ սպանության համար, ճիշտ է ինքը ծեծել է կնոջը, դրա համար զղջում է, սակայն դիտավորություն չի ունեցել սպանելու, իր կինը ջրահեղձումից է մահացել:

Տուժողի իրավահաջորդը՝ սպանվածի քույրը, դատարանում հայտնել է, որ քրոջ ընտանիքում վիճաբանության և ծեծի պատճառը, ըստ քրոջ, եղել է թմրամոլության և սեռական ոտնձգությունների պատճառը: Սեռական ոտնձգություն ասելով՝ նկատի ունի այն, որ, ինչպես քույրն է իրեն պատմել, երբ Արթուրը սեռական ցանկություն է ունեցել, հաշվի չի առել ամբողջ օրը երեխաների ու կենցաղային հարցերով զբաղված լինելու պատճառով հոգնած լինելու հանգամանքը և մերժումը մեկնաբանել է որպես անհավատարմություն:

Բացի այդ, տուժողի իրավահաջորդի խոսքով՝ քույրն իրեն հայտնել է, որ այլևս չի կարողանում այդպես ապրել և ուզում է բաժանվել: Դրան քաջատեղյակ են եղել Արթուրի ծնողները, ովքեր այդ հարցին փորձել են լուծում տալ՝ դեպքից 2 օր առաջ գտնվելով նրանց տանը:

Ըստ նրա ցուցմունքի՝ վերջին օրերին քույրը հաճախակի հեռախոսազրույցի ժամանակ ասել է, թե Արթուրը սպառնացել է, որ կա՛մ կապրի իր հետ, կա՛մ կսպանի: Իսկ դեպքի օրը զանգահարել է քրոջ մեծ աղջկան՝ Գոհարին, և երեխան իրեն հայտնել է. «Մաման մահացել ա, մորքո՛ւր, պապան իրան սպանել ա»:

Նշենք, որ կնոջ դին հայտնաբերվել էր Մեծամոր քաղաքի կոյուղու մաքրման կայան տանող ճանապարհից դեպի Զարթոնք գյուղի ուղղությամբ մոտ 200 մետր հեռավորության վրա` ջրատարի եզրին. նա ոտքերով՝ ազդրերի վերին երրորդի մակարդակից, ամբողջությամբ ընկղմված է եղել ջրի մեջ, իսկ կրծքավանդակի առաջային պատով և դեմքով` հպված խոտածածկ ափին:

Աղբյուր` Փաստինֆո