Սիրիայում ԱՄՆ աջակցությամբ գործող «Սիրիայի դեմոկրատական ուժեր» խմբավորումը (SDF) հայտարարել է, որ կարողացել են վերահսկողություն հաստատել Սիրիայի խոշորագույն նավթահանքերի հատվածում՝ Դեր Զոր նահանգի տարածքում: Այս մասին հայտնում է «ՌԻԱ Նովոստի» լրատվական գործակալությունը:

Գլխավորապես քրդական «Ժողովրդական ինքնապաշտպանության ջոկատներից» (YPG) և մասամբ նաև արաբներից կազմված խմբավորումից հայտնել են, որ հանքավայրերից 3 կմ հեռավորության վրա Սիրիայի կառավարական բանակն է:

Սիրիայի արտգործնախարար Վալիդ Մուալլեմը հայտարարել է, որ քրդերը Սիրիայի կառավարության հետ պայքարում են նավթային շրջաններում վերահսկողություն հաստատելու համար: Նրա խոսքերով, սակայն, «Սիրիան թույլ չի տա խախտել իր տարածքային ամբողջականությունը»:

ՌԴ Դաշնային խորհրդի սենատոր ալեկսեյ Պուշկովն իր հերթին հայտնել է, որ քրդերն առայժմ գրավել են Ալ-Օմարը, բայց նավթահանքերի համար պայքարը դեռ առջևում է:

Հիշեցնենք, որ մի քանի ամիս տևած ռազմական գործողություններից հետո քուրդ-արաբական ուժերն ԱՄՆ օգնությամբ անցյալ շաբաթ վերջնականապես ազատագրեցին ԻՊ կենտրոն Ռաքքա քաղաքը: Այնուհետև քրդական կողմից հայտնել էին, որ իրենք շարունակելու են շարժվել դեպի Դեր Զոր: Մինչ այդ Սիրիայի բանակը արդեն իսկ լայնածավալ գործողություններ էր սկսել Դեր Զորում «Իսլամական պետության» դեմ և հաջողություններ էր գրանցում:

Աղբյուրը՝ razm.info