Այսօր Բարսելոնայում հարյուր հազարավոր ակտիվիստներ կազմակերպել են Իսպանիայից Կատալոնիայի երկրամասի անջատման դեմ բողոքի ցույց:

Ակցիան նախաձեռնել է Քաղաքացիական Կատալոնիա շարժումը, որը համարվում է Կատալոնիայի անկախության գաղափարի դեմ պայքարող հիմնական խմբերից մեկը: Ցույցին մասնակցելու են նաև Իսպանիայի մայրաքաղաք Մադրիդից ժամանած բազմաթիվ ակտիվիստներ:

Քաղաքացիական Կատալոնիա շարժումը պնդում է, որ միջոցառմանը մասնակցում է մոտ 950 հազար մարդ:

Հոկտեմբերի 1-ին Կատալոնիայում տեղի է ունեցել հանրաքվե, որի մասնակիցների 90 տոկոսը քվեարկել է հօգուտ անկախության: Պաշտոնական Մադրիդը ապօրինի է համարում այդ հանրաքվեն, որին մասնակցել է Կատալոնիայի 5 միլիոն 340 հազար ընտրողների 42 տոկոսը:

«Իսպանիան չի պառակտվի, ազգային միասնությունը կպահպանվի», - այսօր ասել է Իսպանիայի վարչապետ Մարիանո Ռախոյն, ով հրաժարվում է բանակցել Կատալոնիայի երկրամասի ղեկավարների հետ:

Նա ասել է, որ Մադրիդը կարող է կիրառել Սահմանադրության ընձեռած իրավական հնարավորությունները և լուծարել Կատալոնիայի տեղական վարչակազմը, ինչպես նաև սառեցնել ինքնավարության կարգավիճակը:

Անվտանգությունն ապահովելու նպատակով Իսպանիայի կենտրոնական իշխանությունը Կատալոնիայում տեղակայել է լրացուցիչ 4 հազար ոստիկաններ:

Աղբյուրը՝ Ազատություն