Նոր ուսումնական տարվանից Վրաստանի պետական դպրոցների աշակերտները ճաշի ընդմիջում կունենան` մեծ դասամիջոցների ներդրման մասին «Մաեստրո» հեռուստաընկերության եթերում հայտարարել է Վրաստանի Կրթության և գիտության նախարար Ալեքսանդր Ջեջելավան:

Վրաստանի Կրթության նախարարությունը դպրոցներում սննդի չափանիշների բարելավման նախագծի շրջանակներում կսկսի աշակերտներին խնձոր բաժանել: Սակայն, այս ծրագիրը վերաբերում է միայն մայրաքաղաքի դպրոցներում սովորող աշակերտներին: Ըստ Ջեջելավայի, երեխաները կստանան մրգեր մեծ դասամիջոցին:

«Մենք վերադարձնում ենք մեծ դասամիջոցը, որը վերջերս կրճատվել էր: Մենք այս որոշումը կայացրել ենք, որպեսզի երեխաները հանգիստ կարողանան ուտել: Մեծ դասամիջոցի ժամանակ մենք կբաժանենք խնձոր, յուրաքանչյուր աշակերտ կստանա մի խնձոր»,-հայտարարել է նախարարը:

Կրթության նախարարության ղեկավարը նաև նշել է, որ նախագծի իրականացման ընթացքում վարչությունը բժիշկների հետ խորհրդակցություններ է անցկացրել: Փորձագետները խորհուրդ են տվել, աշակերտներին առաջարկել հենց խնձոր, քանի որ այս միրգը հիպոալերգիկ է և բացարձակապես օգտակար է բոլոր երեխաների համար:

Խնձորի բաշխման ծրագիրը Կրթության նախարարության կողմից իրականացվող «Առողջ կյանքի կանոններ» լայնամասշտաբ նախագծի մի մասն է: Վարչությունը լրջորեն անհանգստացած է դպրոցների սննդի չափանիշներով և սկսել է ճաշարաններին առողջ սնունդով ապահովելու աշխատանքը այս տարվա մայիսին: Այդ նպատակով Կրթության նախարարությունը խորհրդակցություններ է անցկացնում Գյուղատնտեսության նախարարության և Առողջապահության նախարարության հետ:

Այս տարի վրացական դպրոցների ճաշարաններում կարգելվի վաճառել շոկոլադ, գազավորված խմիչքներ և այլ ապրանքներ, որոնք, ըստ փորձագետների, վնասում են պատանիների առողջությունը:

Աղբյուրը՝ jnews.ge