Այսօր տեղի է ունեցել ԼՂՀ վարչապետ Արա Հարությունյանի տարեվերջյան ամփոփիչ մամուլի ասուլիսը: ԼՂՀ կառավարության տեղեկատվության և հասարակայնության հետ կապերի վարչության փոխանցմամբ՝ պատասխանելով ապրանքների գնաճի վերաբերյալ հարցին՝ նա նշել է, որ սոցիալական լարվածությունը հիմնականում առաջանում է պարենային զամբյուղի թանկացմամբ: Մինչդեռ առաջին անհրաժեշտության մթերքները հնարավոր է արտադրել ԼՂՀ-ում:

Նա ավելացրել է, որ Հանրային ծառայությունները և տնտեսական մրցակցությունը կարգավորող պետական հանձնաժողովի կողմից դիտարկումներ կանցկացվեն՝ Ամանորի նախաշեմին սովորաբար արձանագրվող գների մեծ տատանումները կանխելու համար:

Կառավարության ղեկավարի խոսքով՝ 2011թ. կառավարության թիրախային ծրագրերն են լինելու պարենային անվտանգությունն ու էներգետիկ անկախությունը: Գալիք տարում շեշտակի քայլեր են ձեռնարկվելու մեծ քանակությամբ ցորենի, բուսական յուղի արտադրության, գյուղմթերքների վերամշակման, ինչպես նաև անասնաբուծության զարգացման ուղղությամբ: Նախատեսվում է ՀՆԱ-ի 9 տոկոս աճ:

Հանրապետության Էներգետիկ անկախությունն ապահովվելու է գործող և կառուցվող ՀԷԿ-երի միջոցով: Վարչապետը մեծ ակնկալիքներ ունի նաև բիոէներգետիկ ճյուղից, որի զարգացման համար Արցախը ունի հսկայական պաշարներ: Այն թույլ կտա մի քանի տարվա ընթացքում ամբողջությամբ լուծել ջեռուցման հարցը:

«Փորձեր արդեն իսկ կատարվում են, որոնցից կարելի է եզրակացնել, որ բիոէներգետիկան կարող է արտահանման համար լուրջ ճյուղ հանդիսանալ»,-ասել է Ա.Հարությունյանը:

Խոսելով վերաբնակեցման ծրագրի մասին՝ Ա.Հարությունյանը նշել է, որ անցած տարի միայն Քաշաթաղի շրջանում 200-ից ավելի ընտանիքներ են վերաբնակեցվել: Կառավարությունը շարունակելու է այդ ծրագիրը, որի արդյունավետությունը հիմնականում պայմանավորված կլինի շրջանների ենթակառուցվածքների վերականգնմամբ: Արցախում վերաբնակվել ցանկացողներին կտրվեն արտոնյալ վարկեր, շինանյութեր, կփոխհատուցվեն փոխադրամիջոցների համար պահանջվող գումարները:

Արտաքին քաղաքականության բնագավառում, ըստ ԼՂՀ վարչապետի, շոշափելի արդյունքներ չեն արձանագրվել: Շարունակվում են բանակցությունները, գնալով Արցախն աշխարհին ավելի ճանաչելի է դառնում: Արա Հարությունյանը համոզված է.

«Ժամանակը աշխատում է մեր օգտին»:

Արցախի ճանաչման հարցերով հատուկ հանձնախմբի ստեղծումը և նմանատիպ յուրաքանչյուր այլ քայլ արտաքին աշխարհին ներկայանալու գործընթացում կունենա դրական ազդեցություն:

Լրագորղների հարցերին պատասխանելով՝ Ա.Հարությունյանը խոսել է նաև փախստականների բնակարանային խնդիրների լուծման, 2011թ. զոհված ազատամարտիկների ընտանիքներին բնակարանով ապահովման ծրագրի ավարտի, մայրաքաղաքում իրականացվող տարբեր ծրագրերի, հարկային քաղաքականության և այլնի մասին:

Շնորհավորելով լրագրողներին Ամանորի և Սուրբ ծննդյան տոների առթիվ՝ Ա.Հարությունյանը մաղթել է, որ Արցախի հզորացման և ճանաչման ճանապարհին 2011 թվականը լինի բեկումնային տարի:

7or.am