Ամերիկյան պատժամիջոցները շրջանցելու նպատակով Իրանին գաղտնի օգնություն ցուցաբերելու գործով ԱՄՆ-ի իրավապահների կողմից մեղադրվող՝ Թուրքիայի էկոնոմիկայի նախկին նախարար Մեհմեդ Ջաֆեր Չաղլայանին մինչև 95 տարվա ազատազրկում է սպառնում։

Թուրքական «Ջումհուրիեթ»-ի հաղորդմամբ, Չաղլայանի պատժաչափը կարող է ավելանալ՝ գերազանցելով 100 տարին։ ԱՄՆ Մանհեթենի շրջանային դատարանի մեղադրական եզրակացության համաձայն, թուրք նախարարը միլիոնավոր դոլարների կաշառքի և ոսկերչական իրերի դիմաց աջակցել է, որ Իրանը կարողանա դրամական փոխանցումներ կատարել Միացյալ Նահանգների ֆինանսական համակարգի միջոցով՝ շրջանցելով Իրանի նկատմամբ սահմանված պատժամիջոցները:

Նույն գործով մեղադրվող՝ իրանական ծագմամբ թուրք գործարար Ռեզա Զարաբը, որը ձերբակալվել էր անցած տարի և Նյու Յորքի դադարանի առաջ էր կանգնել Իրանին աջակցելու, նաև իրանական մի շարք կառույցների արժույթ և ոսկի վաճառելու համար։ Զարաբին մինչև 75 տարվա ազատազրկում է սպառնում։

Զաֆեր Չաղլայանից և Ռեզա Զարաբից բացի, ամերիկյան դատարանի մեղադրական եզրակացության մեջ հիշատակվում են ևս 9 հոգի, այդ թվում թուրքական պետական «Հալք» բանկի կառավարիչ Սուլեյման Ասլանը, նրա տեղակալներ Լևենթ Բալկանն ու Մեհմեդ Հաքան Աթիլան։

Աղբյուրը՝ Ազատություն