Լրագրողների հետ հանդիպման ժամանակ Սպառողների միության նախագահ Արմեն Պողոսյանն ասել էր, թե Հայաստանում գնաճ է արձանագրվել, և անձամբ ինքը բազմիցս այս հարցի շուրջ բողոքներ է լսել:

-Պետական վիճակագրական վարչության տվյալներն ասում են, որ գները վերջին մեկ տարում 6,5%-ով են աճել: Բայց եթե անդրադառնանք առանձին ապրանքատեսակների և ծառայությունների, այդ թվում, օրինակ, տրանսպորտին և կապին, ապա դրանց գներն աճել են 11,5%-ով, բնակվարձ, վառելիք, էլեկտրաէներգիա խումբը՝ 16,8%-ով,-նշել է նա։

Արմեն Պողոսյանի խոսքերով՝գների աճի վերաբերյալ բազմաթիվ բողոքներ են ստացվել, որոնք հիմնականում վերաբերում են սննդամթերքին, մասնավորապես կարագին:

-Մենք չպետք է մոռանանք, որ ապրիլի մեկը շուտով գալու է, և գազի սակագնի թանկացման խնդիրը, հայտը արդեն դրված է պետական հանձնաժողովի սեղանին,-նշել է փորձագետը:

Արմեն Պողոսյանը նշել է նաև, որ գազի գինը շատ են թանկացնում, որովհետև ուռճացվում են հավելյալ ծախսերի չափերը։

-Բոլորս գիտենք, որ մեզ համար գինն արտոնյալ է. այսօրվա վիճակով 154 դոլար սակագին որևէ երկրում չկա: Եվ բարձրանալու միտումը 154-ից 180 է (Կրեմլում է ընդունված այդ որոշումը): Մեր երկիրը ռեսուրսներ ունի: Ես ուզում եմ ևս մեկ անգամ շեշտել, որ էլեկտրաէներգիան մեր հաղթաթուղթն է: Մեր երկիրը երկրագնդի բացառիկ և երևի միակ երկիրն է, որ հնարավորություն ունի զարգացնել էլեկտրաէներգիայի արտահանումը և կիրառումը ներսում,-նշել է նա։

7or.am