Երեւան քաղաքի դատախազի կողմից հարուցվել է քրեական գործ՝ «Դ. Համբարձումյանի ավան ջրացատկի օլիմպիական հերթափոխի մասնագիտացված մանկապատանեկան մարզադպրոց»- ի լողավազանում թվով 9 անչափահասների թունավորման դեպքի առթիվ՝ ՀՀ քրեական օրենսգրքի 279-րդ հոդվածի 2-րդ մասի 1-ին եւ 2-րդ կետերով:  Նախաքննությամբ պարզվել են թունավորման պատճառները, լողավազանի ջրի քլորացման համակարգի գործարկման խախտումները:

Այսպես՝ 2010թ. դեկտեմբերի 8-ին՝ ժամը 17:20-ից 18:25-ն ընկած ժամանակահատվածում, Երեւան քաղաքի «Սուրբ Աստվածամայր» եւ «Մուրացան»  բժշկական կենտրոններից  ՀՀ ոստիկանության  կենտրոնականի բաժնում  հաղորդումներ էին ստացվել, որ հիշյալ բժշկական հաստատություններ են տեղափոխվել թվով 9 անչափահասներ: Բժշկական հետազոտությամբ վերջիններիս մոտ ախտորոշվել է սուր քլորային թունավորում:

Նախաքննությամբ  պարզվել է, որ վերոհիշյալ 9 անչափահաս անձինք թունավորվել են  Երեւան քաղաքի «Դ. Համբարձումյանի անվան ջրացատկի օլիմպիական հերթափոխի մասնագիտացված մանկապատանեկան մարզադպրոց»-ի  լողավազանում մարզումների ժամանակ:  Պարզվել է նաեւ, որ դեպքի օրը՝ դեկտեմբերի 8-ին՝ ժամը 16:00-ի սահմաններում, մարզադպրոցի նախկին աշխատակից Ռ. Հակոբյանը լողավազանի ջրի քլորացման  համակարգի դատարկ  գլանանոթը  նորով փոխարինելուց հետո հնոցապան Ռ. Հակոբյանի եւ բանվոր Ս. Հովասափյանի  հետ  իրականացրել է  քլորացման համակարգի փորձարկում, որի ժամանակ բաց թողնված քլորի մի մասը  լողավազանի ջրի հետադարձ  հոսքի խողովակով  ֆիլտրացման համակարգ հոսելու փոխարեն  շուրջ 1 ամիս առաջ  խափանված փականի միջով  թափանցել է  լողավազանի ջրի  արտահոսքի տարողություն, որտեղից էլ ջրի արտահոսքի  համակարգի միջոցով՝ լողավազան:

Ձեռք բերված տվյալների համաձայն՝   մարզադպրոցի  ջրի քլորացման տեղամասը, հանդիսանալով արտադրական վտանգավոր օբյեկտ, «Տեխնիկակական անվտանգության ազգային կենտրոն» ՊՈԱԿ-ի հետ  կնքված պայմանագրերի համաձայն  2009-2010թթ. ընթացքում փորձաքննությունների է ենթարվել  հիշյալ ՊՈԱԿ-ի փորձագետ Ռ. Դանիելյանի կողմից: Փորձաքննությունների արդյունքում հայտնաբերվել են տեխնիկակական անվտանգության կանոնների  բազմաթիվ խախտումներ, որոնց պայմաններում   քլորացման տեղամասը  չպետք է թույլատրվեր շահագործման, սակայն փորձագետի կողմից տրվել են դրական եզրակացություններ եւ թույլատրվել է տեղամասի շահագործումը:

Բացի այդ՝ մարզադպրոցի լողավազանի ջրի քլորացման համար օգտագործվել են քլորով լիցքավորված  մետաղյա գլանանոթներ, որոնք լիցենզավորված կազմակերպությունների փոխարեն  ձեռք են բերվել «Երեւան ջուր» ՓԲԸ-ի «Ծարավ աղբյուր»  պոմպակայանի պետ Վ. Բեգլարյանից, ով նախաքննության ընթացքում տեղեկացրել է, որ խմելու ջրի քլորացման  համակարգի համար  իր ղեկավարած պոմպակայանում  ստացված տարրաներից  քլորը տեխնիկական  միջոցների գործադրմամբ լիցքավորել է  տարիներ առաջ իր կողմից  ձեռք բերված  գլանանոթների մեջ եւ տեղափոխել մարզադպրոց: Նախաքննությունը շարունակվում է, միջոցներ են ձեռնարկվում՝  մեղավոր անձանց պարզելու եւ նրանց գործողություններին համապատասխան քրեաիրավական գնահատական տալու համար:

Ինչ վերաբերում է երեխաների թունավորման դեպքի  առթիվ հարուցված քրեական գործով բացահայտված հափշտակությանը, ապա
այդ դրվագն անջատվել է առանձին վարույթ եւ ձեռք բերված ապացույցների հիման վրա «Երեւան ջուր» ՓԲԸ-ի «Ծարավ աղբյուր»  պոմպակայանի պետ Վ. Բեգլարյանին մեղադրանք է առաջադրվել ՀՀ քրեական օրենսգրքի 214-րդ եւ 179-րդ հոդվածների 1-ի մասերով՝ առեւտրային կազմակերպության ծառայողի կողմից լիազորությունները չարաշահելու եւ  յուրացման եղանակով  զգալի չափերով  հափշտակություն կատարելու համար:

Նախաքննության արդյունքների մասին տեղեկատվություն կտրամադրվի լրացուցիչ: