Հայաստանի, Ռուսաստանի և Ադրբեջանի նախագահների հանդիպման ավարտին ՌԴ արտգործնախարար Սերգեյ Լավրովը լրագրողներին հայտնել է, որ Հայաստանի և Ադրբեջանի նախագահները համաձայնեցրել են Լեռնային Ղարաբաղի հակամարտության կարգավորման փաստաթղթի ներածական մասը։

Նրա խոսքերով՝ Սերժ Սարգսյանը և Իլհամ Ալիևն իրենց առաջարկությունները կնախապատրաստեն, և դրանք կմտցվեն փաստաթղթի մեջ։ Այդ փաստաթուղթը պատրաստվել է ԵԱՀԿ Մինսկի խմբի համանախագահների առաջարկությունների հիման վրա։

«Այսօրվա գլխավոր արդյունքը ձեռք բերված համաձայնությունն է, որ թեև կան փաստաթղթի որոշ հատվածներ, որոնք կողմերի համաձայնության առարկա դեռ չեն հանդիսանում, բայց այդ հատվածների վերաբերյալ կողմերը կպատրաստեն իրենց կոնկրետ գաղափարները, ձևակերպումները, որոնք կներառվեն այդ տեքստում»,- հայտարարել է Լավրովը:

Նա նաև ասել է, որ ղարաբաղյան հակամարտության կարգավորման փաստաթղթի ներածական մասն արդեն համաձայնեցված է։