Տավուշի մարզի Բագրատաշեն գյուղի բնակիչներն այսօր հավաքվել էին սահմանային անցակետի մոտ և ժամանակ առ ժամանակ փակում էին Հայաստան մտնող ճանապարհը՝ հատկապես մեծ բեռնատարների համար։ Այս մասին հայտնում է Ազատությունը։

Հուլիսի 1-ից ուժի մեջ են մտել Եվրասիական տնտեսական միության (ԵՏՄ, ԵԱՏՄ) հանձնաժողովի կողմից հաստատված նոր պահանջները, ըստ որոնց, Եվրասիական տնտեսական միության տարածք առանց մաքսազերծման կարելի է ներմուծել միայն մինչև 5 կգ կարանտինային հսկողության ենթակա բուսասանիտարական արտադրանք։ Դրանց մեջ մտնում են գրեթե բոլոր տեսակի միրգն ու բանջարեղենը։

«Վեց հատ ձմերուկ եմ բերել, երկուսը վերցրել են», - ասաց «Ազատության» զրուցակիցներից մեկը։ Մյուսն էլ հավելեց. «15 հատ ավել էի բերել, հինգ կիլոն անցավ, տարան մաքսազերծման։ Տասը կիլոյանոց ձմերուկ բերի, կեսը կտրեցի տվեցի իրանց»։

Հայ-վրացական սահմանի բնակիչները, ովքեր տարիներ շարունակ Վրաստանից փոքր քանակով ապրանք են ներկրել նաև փոքր առևտրի նպատակներով, ասում են՝ անելանելի դրության մեջ են ու կանգնել են մեծ խնդիրների առաջ։