2017 թ. հունիսի 27-ի վերաֆինանսավորման տոկոսադրույքի վերաբերյալ

● Տնտեսական

08.07.2017 ● 16:06

2017 թ. հունիսի 27-ի վերաֆինանսավորման տոկոսադրույքի վերաբերյալ

2017 թ. հունիսի 27-ի ՀՀ ԿԲ խորհրդի նիստին մասնակցում էին` ՀՀ ԿԲ նախագահ Արթուր Ջավադյանը, ՀՀ ԿԲ նախագահի տեղակալներ Ներսես Երիցյանը, Վախթանգ Աբրահամյանը, խորհրդի անդամներ Աշոտ Մկրտչյանը, Արթուր Ստեփանյանը, Արմենակ Դարբինյանը, Օլեգ Աղասյանը, Արկադի Խաչատրյանը:

Խորհրդի նիստը սկսվեց հունիսի 27-ի դրությամբ Իրավիճակային հաշվետվության ներկայացմամբ: Քննարկվեցին գնաճի, արտաքին միջավայրի, իրական, հարկաբյուջետային և դրամավարկային հատվածների զարգացումները:

Փաստվեց, որ 2017թ-ի մայիսին արձանագրվել է 0.2% գնանկում՝ նախորդ տարվա նույն ամսվա 0.7%-ի դիմաց, որի պարագայում 12-ամսյա գնաճը շարունակել է ավելանալ՝ ամսվա վերջին կազմելով 1.6%: Ընդ որում, գնաճը վերականգնվում է փոքր-ինչ ավելի արագ տեմպերով՝ պայմանավորված ինչպես գյուղմթերքների գների սեզոնային ավելի քիչ նվազմամբ, այնպես էլ բնականոն գնաճի բաղադրատարրերի փոփոխություններով: Ըստ ԿԲ գնահատման, հունիսին ևս սպասվում է գնաճի ավելի արագ վերականգնում, սակայն այս դեպքում արդեն ազդեցության գերակշռող մասը բաժին կընկնի բնականոն գնաճին: Արդյունքում, կանխատեսվող 0.8%-ի փոխարեն հունիսի վերջին 12-ամսյա գնաճը կգտնվի 1.0%-1.2% միջակայքում:

Արձանագրվեց, որ hունվար-մայիս ժամանակահատվածում ՀՆԱ-ի աճը գերազանցել է ակնկալիքները՝ հիմնականում պայմանավորված արդյունաբերության և ծառայությունների ոլորտներում արձանագրված բարձր աճերի՝ համապատասխամաբար 14.4% և 11.1%: 2017թ. հունվար-մայիս ժամանակահատվա-ծում տնտեսական ակտիվության ցուցանիշի աճը կազմել է 6.4%: Գերազանցումն առավելապես տեղի է ունեցել առաջարկի գործոնների ազդեցությամբ, մասնավորապես, արտահանման՝ սպասվածից ավելի արագ աճի տեմպերով՝ հունվար-մայիսին տ/տ 20.9%, և հարկային վարչարարությամբ: Եվ, քանի որ հարկաբյուջետային ազդակը երկրորդ եռամսյակում դարձել է ավելի զսպող՝ առաջին եռամսյակի 2.1%-ի դիմաց 4.0%, ապա ներքին պահանջարկի շարունակվող վերականգնումն ամբողջովին պայմանավորվել է ստեղծված մակրոտնտեսական կայունությամբ, ԿԲ կողմից իրականացվող ընդլայնողական դրամավարկային քաղաքականությամբ և առկա համեմատաբար ցածր գնաճային սպասումներով: Արդյունքում, պահանջարկի վերականգնումը գերազանցել է սպասումները 0.1-0.2 տոկոսային կետով՝ հիմնականում ի հաշիվ մասնավոր սպառման գծով արձանագրված ավելի բարձր աճի, ինչը պայմանավորվել է շրջանառությունում գտնվող կանխիկի, ներմուծման և առևտրի ոլորտներում դիտված բարձր աճերով՝ համապատասխանաբար 19.1%, 24.4% և 12.8%: Միևնույն ժամանակ, ԿԲ խորհուրդը քննարկեց նաև պետբյուջեի պակասուրդի կրճատման հնարավոր դրական ազդեցությունը պետական պարտքի և մակրոտնտեսական կայունության ապահովման տեսանկյունից, ինչը, ըստ ԿԲ գնահատման, իր դրսևորումը կունենա ՀՆԱ ներուժի ապագա զարգացումներում:

Հաշվի առնելով տարվա առաջին եռամսյակում սպասվածի համեմատ արձանագրված բարձր տնտեսական աճը, ինչպես նաև երկրորդ եռամսյակում այդ զարգացումների շարունակականությունը` ԿԲ-ն իրական հիմքեր է տեսնում դրամավարկային քաղաքականության երրորդ եռամսյակի ծրագրում տնտեսական աճի կանխատեսումը դեպի վերև վերանայելու համար:

Արձանագրվեց, որ արտաքին հատվածում գործընկեր երկրների տնտեսական աճի փաստացի ցուցանիշները բավականին մոտ են եղել ԿԲ գնահատումներին, իսկ հումքային և պարենային ապրանքների շուկաներում դիտվել են գնանկումային դրսևորումներ, որոնք գնահատվել են կարճաժամկետ, քանի որ հիմնականում բնութագրվել են առանձին շուկաների առաջարկի զարգացումներով: Այսպես, մինչև հունիս Պարենի և գյուղատնտեսության կազմակերպության (FAO) կողմից հաշվարկվող պարենի գների ինդեքսի վարքագիծն արտահայտում է գնաճային միտումներ. համաձայն հունիսի 8-ի հրապարակման, մայիսին` նախորդ ամսվա նկատմամբ ինդեքսն աճել է 2.2%-ով, նախորդ տարվա նույն ժամանակահատվածի նկատմամբ՝ 10.0%-ով: Իսկ հունիսին, պայմանավորված թե՛ հումքային և թե՛ պարենային ապրանքների առաջարկի մեծ ծավալներով, ձևավորվել են սպասվածից ցածր գներ: Խորհուրդը գնահատեց, որ նման իրավիճակում արտաքին հատվածից ապագայում էական գնաճային ազդեցություններ չեն ակնկալվում:

Խորհուրդը քննարկեց նաև ֆինանսական շուկայի զարգացումները և արձանագրեց, որ շուկայում տեղի ունեցած ճշգրտման արդյունքում միջբանկային տոկոսադրույքների և քաղաքականության տոկոսադրույքի միջև առկա ճեղքը կրճատվում է: ԿԲ խորհուրդը գնահատում է, որ անհրաժեշտության դեպքում կկիրառվեն դրամավարկային բոլոր հնարավոր գործիքները՝ տոկոսադրույքների շեղումը նվազագույնի հասցնելու համար:

Իրավիճակային հաշվետվության և արտաքին ու ներքին մակրոտնտեսական զարգացումների վերաբերյալ քննարկումից հետո Խորհուրդն անցավ դրամավարկային քաղաքականության ուղղությունների քննարկմանն ու քաղաքականության տոկոսադրույքի որոշման կայացմանը: Խորհուրդը միակարծիք էր, որ թե՛ արտաքին և թե՛ ներքին տնտեսական զարգացումները էական գնաճային ազդեցություններ չեն պարունակում, գնաճային ռիսկերը հիմնականում հավասարակշռված են և գնաճային սպասումները՝ համեմատաբար ցածր: Ելնելով դրանից՝ ԿԲ խորհուրդը նպատակահարմար գտավ անփոփոխ թողնել դրամավարկային պայմանները՝ գնահատելով, որ դրանք բավարար նպաստում են գնաճի հետագա վերականգնմանը և կանխատեսվող հորիզոնում նպատակային ցուցանիշի ապահովմանը:

Միևնույն ժամանակ, Խորհուրդը գտնում էր, որ ակնկալվող մակրոտնտեսական զարգացումների դրսևորման պարագայում տոկոսադրույքը մի որոշ ժամանակ կպահպանվի նույն մակարդակում: Գնաճի և մակրոտնտեսական ցուցանիշների կանխատեսվող հետագծից շեղման դեպքում դրամավարկային քաղաքականության ուղղությունները համապատասխանորեն կճշգրտվեն՝ միջնաժամկետ հատվածում ապահովելով գնաճի նպատակի իրագործումը:

Այս մասին հայտնում են ԿԲ հասարակայնության հետ կապերի ծառայությունից։

● Այս խորագրի վերջին նյութերը

Արդյունաբերության, արտահանման և ներմուծման ցուցանիշները անկում են գրանցել. «ԼՈՒՅՍ» հիմնադրամ

27.12.2024 ● 16:45

Տնտեսական ակտիվության աճի տեմպն էականորեն դանդաղել է։

7-ժամյա աշխատանքային օրը ՀՀ տնտեսության անկման ֆոնին նախընտրական պոպուլիզմ է. փորձագետ

26.12.2024 ● 11:28

Նման նախաձեռնությունների շարքին կարելի է դասել անհույս պարտապանների համար վերջերս ընդունված համաներման մասին օրենքը:

Երևանում աղբահանության վճարի հաշվարկը կկատարվի ըստ բնակարանի մակերեսի

24.12.2024 ● 19:59

Դրույքաչափերի սահմանման նախագծի համաձայն բնակելի շինությունների կոշտ կենցաղային թափոնների մասով դրույքաչափը քմ-ը 13 դրամ է սահմանվում:

Պարգևավճարների աճ, կապիտալ ծախսերի նվազում և չիրականացվող ծրագրեր՝ Երևանի պատկերը 2025թ.-ին. «ԼՈՒՅՍ» հիմնադրամ

24.12.2024 ● 19:39

Քաղաքային իշխանությունները կաղում են նաև բյուջեի պակասուրդի պլանավորման հարցում։

Միջոցառումների տոմսերի գնման առավել պարզ ու հարմար լուծում․ Ամերիաբանկը ներկայացնում է EventHub.am-ը

11.12.2024 ● 15:51

Գործունեության շուրջ 1 տարվա ընթացքում EventHub-ը հաջողությամբ համագործակցել է միջոցառումների 100-ից ավելի կազմակերպչի հետ` վաճառելով 500-ից ավելի միջոցառման տոմսեր:

Օնլայն տաքսիների վարորդները բողոքի ակցիա են անում․ «Մայր Հայաստանի» անդամները տեղում են (տեսանյութ)

11.12.2024 ● 13:45

Բողոքի ակցիայի վայր են ժամանել Երևանի ավագանու «Մայր Հայաստան» խմբակցության անդամները։

«Օփելով հպարտներից»՝ «Օփելով համբալ»․ «Կարճ ասած» (տեսանյութ)

Փաշինյանը իրեն սպառել է․ Վարդան Օսկանյան (տեսանյութ)

Այս իշխանության ապազգային քայլերից մեկն է զրկել Վեհափառ Հայրապետին ամանորից անմիջապես առաջ խոսք հղել մեր հայրենակիցներին

● Տնտեսական