Դիարբեքիրի Լիջե, Հազրո և Քոջաքյոյ շրջանների 39 գյուղում պարետային ժամ (փողոց դուրս գալու արգելք) է հայտարարվել:

Ըստ թուրքական «Dogruhaber.com.tr» լրատվական կայքի՝ այս մասին հայտարարություն է տարածել Դիարբեքիրի նահանգապետարանը:

Հայտարարության մեջ ասվում է, որ Թուրքիայի անվտանգության ուժերը պատրաստվում են նշյալ գյուղերի վարչական սահմանների մեջ մտնող անտառային և լեռնային տեղանքներում հատուկ գործողություն անցկացնել «Քուրդիստանի բանվորական կուսակցության» (PKK-ՔԲԿ) անդամների դեմ:

Նշվում է, որ տեղեկություններ կան ՔԲԿ-ական բարձրագույն ղեկավարության՝ այդ տեղանքներում թաքնվելու մասին:

Ըստ հաղորդված պաշտոնական տեղեկատվության՝ այդ շրջաններում են տեղակայված նաև քուրդ զինյալներին պատկանող հենակետեր ու զինապահեստներ:

Նշենք, որ հունիսի 15-ին տարածված հայտարարություններով էլ պարետային ժամ էր մտցվել Դիարբեքիրի Քուլփ շրջանի 25 գյուղերում և Բիթլիսի Հիզան շրջանում:

Աղբյուրը` Ermenihaber.am