Աթենքում Հայաստանի Հանրապետության դեսպանության նախաձեռնությամբ եւ Հունաստանի Ազգային պատմական թանգարանի հովանավորությամբ ուրբաթ, դեկտեմբերի 10-ին, ժամը 19:00-ին Հունաստանի հին խորհրդարանի սրահում կայացավ Հունաստանում եւ Կիպրոսում ՀՀ ռազմական կցորդ, գնդապետ Սամվել Ռամազյանի հեղինակած ՙՀայ-հունական ռազմական առնչությունների եւ համագործակցության պատմություն՚ երկլեզու' հայերեն-հենարեն հրատարակության շնորհանդեսը:

Հանդիսատեսներով լեցուն սրահում հյուրնկալվում էին' Հունաստանի ազգային հերոս Մանոլիս Ղլեզոսը, խորհրդարանի նախկին նախագահ' Ապոստոլոս Կակլամանիսը, խորհրդարանի Հայ-հունական բարեկամության խմբի անդամ, Անաստասիոս Ներանձիսը, խորհրդարանի Հայ-հունական բարեկամության խմբի անդամ, Ներքին գործերի նախկին նախարար' Պրոկոպիոս Պավլոպուլոսը:

Հունաստանի Զինված ՈՒժերից ներկա էին, Ազգային Պաշտպանության նախարար Էվանգելոս Վենիզելոսի և ԱՊՆ ներկայացուցիչներ, ԱՊ, Ցամաքային Զորքերի, Ռազմաօդային և Ռազմածովային ուժերի գլխավոր շտաբների պետերի ներկայացուցիչներ, ԱՊ ԳՇ միջազգային հարաբերութունների վարչության պետ, բրիգադի գեներալ Անդրեաս Բլանոս, ՀՀ-ում պաշտոնավարած հույն ռազմական կցորդներ, ՑԶ «Էվելպիդոն» ռազմական ակադեմիայի հայ, հույն և կիպրացի կուրսանտներ և պրոֆեսորա-դասախոսական կազմ:

Ռազմական կցորդների ասոցիացիայի դին, Ռումինիայի ռազմական կցորդ, գնդապետ Ադրիան Դուտա, եւ Ռուսաստանի, Ֆրանսիայի, Բուլղարիայի, Հունգարիայի, Իրանի, եւ Թուրքիայի ռազմական կցորդները:

Նույնպես ներկա էին հունական գիտական շրջանակների ներկայացուցիչներ, հունական ռազմական հանդեսների ներկայացուցիչներ, Հունաստանում հրատարակվող անգլիալեզու և ռուսալեզու ԶԼՄ-ների թղթակիցներ, հունական հայրենակցական, հասարակական-մշակութային միությունների ներկայացուցիչներ:

Հույն և օտարերկրյա հյուրերի, հայ հոգևոր դասի ներկայացուցիչների եւ հայկական մամուլի ու կազմակերպությունների, կառույցների և միությունների պատասխանատուների ներկայությամբ ըստ նախատեսված ծրագրի ելույթ ունեցան հանդիսությունը նախագահող, գրքի գլխավոր խմբագիր' պրն. Հովսեփ Բարազյանը, Կոստանդնուպոլսեցիների համաշխարհային միության նախագահ, Աթենքի ազգային ճարտարագիտական համալսարանի դասախոս' պրոֆեսոր Նիկոլաոս Ուզունօղլուն, գրքի թարգմանչուհի Երանուհի Ղազարյանը և բանասեր-պատմաբան Նիկոլաոս Դելագրամատիկասը:

Բանախոսները անդրադարձան հայ-հունական դարավոր հարաբերություններին և արձանագրեցին այն փաստը, որ այդ առնչությամբ թերացել է պատմագրությունը եւ գնդապետ Ռամազյանի այս աշխատությունը գալիս է լցնելու այդ բացը:

Հայ-հունական հարաբերությունների մասին կարելի է խոսել երկար, քանի որ դարեր շարունակ երկու ժողովուրդներն ապրել են իրար կողք կողքի: Հարաբերությունները եղել են բազմաբնույթ ու տարբեր' ընդգրկելով գրեթե բոլոր ոլորտները, քանի որ մինչև Օսմանյան կայսրության հիմնադրում, երկու ժողովուրդները եղել են անմիջական հարևաններ, շատ հաճախ գտնվել են մեկ կայսրության սահմաններում, հաճախ պայքարել միմյանց դեմ, հաճախ միասնաբար ելել ընդհանուր թշնամու առաջ: Բանախոսները նշեցին, որ բազմապիսի և բազմազան է հայ-հունական հարաբերությունների ոլորտը, որի մասին մեծ թվով աշխատություններ առկա են, սակայն առանձին և ծավալուն ուսումնասիրություն դեռևս չկար ՀԱՅ-ՀՈՒՆԱԿԱՆ ՌԱԶՄԱԿԱՆ ՀԱՐԱԲԵՐՈՒԹՅՈՒՆՆԵՐԻ վերաբերյալ: Նրանք նշեցին, որ հարաբերությունների այս ոլորտն առանձին ուսումնասիրության կարիքը և այդ բացը եկավ լրացնելու ՀՀ Ռազմական կցորդ գնդապետ Սամվել Ռամազյանի հեղինակած գիրքը:

Այս աշխատությունը բավականին ծավալուն և ընդգրկուն է. հեղինակը ուսումնասիրության առարկա է դարձրել երկու ժողովուրդների ռազմական համագործակցության վերաբերյալ պատմությանը հայտնի գրեթե բոլոր փաստերը' սկսած վաղնջական ժամանակներից մինչև մեր օրերը, առաջին անգամ շրջանառության մեջ  դրելով որոշ դիտարկումեր առանձին փաստերի առումով: Առարկայական փաստերի և ուսումնասիրությունների վրա հիմնված գիրքը, վերհանել է հայկական ու հունական զինվորական և պատմական արխիվներից և մասնավոր հավաքածուներից վերցված նյութեր, փաստաթղթեր ու լուսանկարներ, որն առանձին կարևորություն ու նշանակություն է տվել գրքին:

Հեղինակը գրքի նախաբանում հույս է հայտնել, որ իր աշխատությունը հիմք և խթան կդառնա հետագա ուսումնասիրությունների և հրատարակությունների համար, որը անհրաժեշտ է նկատել երկու երկրների և ժողովրդներւ արդի գերազանց համագործակցության ծավալման տեսանկյունից, որը կլինի պատգամ երկու ժողովուրդների ներկա ու գալիք սերունդների համար: