-Իմ պատկերացմամբ՝ Թուրքիան սահմանը չի բացի այնքան ժամանակ, որքան չի ստանա Հայաստանից իր զիջումների ամբողջական փաթեթը,- նման կարծիք է հայտնել «Հայկական ընտրություն» կուսակցության նախաձեռնող խմբի անդամ Ալեքս Քանանյանը։

Նա նշել է, որ Թուրքիան և առհասարակ թուրքական դիվանագիտությունը շատ հետևողական, իսկ որպես գործելաոճ՝ նաև ակնհայտորեն լկտի է, հայ-թուրքական բաժանարար գծի բացումն էլ շատ ավելի ձեռնտու է հենց թուրքական, քան հայկական կողմին, սակայն քանի որ թուրքական կողմը միշտ ձգտել է և գոնե հայ ժողովրդի հետ իր հարաբերություններում միշտ վերցրել է ամեն ինչ, ապա այսօր էլ չի բավարարվի մասնակի լուծումներով։

-Հետևաբար, իմ պատկերացմամբ, ապօրինի հայ-թուրքական բաժանարար գիծը, որը ոմանց կողմից անհեթեթորեն և հանցագործ կերպով հորջորջվում է որպես հայ-թուրքական պետական սահման, չի բացվելու այնքան ժամանակ, որքան Թուրքիան Հայաստանից չի կորզի իր զիջումների ամբողջական փաթեթը։ Եվ անգամ եթե արձանագրությունները վավերացվելու են մինչև ապրիլի 24-ը, ինչը որոշակիորեն հավանական է, եթե ենթադրենք, որ ճնշումը Թուրքիայի վրա ԱՄՆ-ի կողմից զորեղ լինի, այնուամենայնիվ անգամ դրանց վավերացումը ոչ մի գործնական արդյունքի չի հանգեցնի։ Իսկ մենք շատ լավ գիտենք, որ ներկայիս վարչախմբի համար այդ ամենի հիմնարար նպատակը այսպես կոչված բաժանարար գծի բացումն է և հաղորդակցման կոմունիկացիաների վերագործարկումը,- ընդգծել է Ալեքս Քանանյանը։

7or.am