Շիրակի մարզի Ախուրյան համայնքում բոլորովին վերջերս գործարկված շաքարի գործարանը, որը պատկանում է ԱԺ պատգամավոր Սամվել Ալեքսանյանին (Լֆիկ Սամո) արդեն մի քանի օր է, ինչ չի աշխատում: Հսկիչները տեղեկացրել են, որ գործարանի տնօրինությունը ժամանակավորապես փակել է բոլոր արտադրամասերը և տեղափոխվել Երևան: Իսկ աշխատողներին փոխանցել են, թե հարկադիր պարապուրդը կարող է տևել մի քանի ամիս: Նշենք, որ շաքարի գործարանի պաշտոնական բացման արարողությանը մասնակցում էր նաև ՀՀ նախագահ Սերժ Սարգսյանը:

Գործարանի աշխատակիցները նշում են, որ շաքարավազ արտադրելու համար հումք չկա: Ախուրյանի բնակիչ Հրաչ Պողոսյանը, ով աշխատում է շաքարի գործարանում, ասել է, թե իրենց աշխատանքի են կանչել գարնանը։

«Հումքի բացակայության պատճառով ժամանակավորապես դադարեցվել է գործարանի աշխատանքը մինչև գարուն,-ասել է Հրաչ Պողոսյանը:

Ախուրյանի շաքարի գործարանի գործադիր տնօրեն Էդուարդ Սարգսյանը հաստատել է, որ գործարանի աշխատանքների  ժամանակավոր դադարի պատճառը հումքի բացակայությունն է:

-Մինչ օրս ներկրվել է 17 հազ. տոննա կիսաֆաբրիկատ հումք՝ հիմնականում Բրազիլիայից: Իսկ հիմա հումքի ներկրման հետ կապված խնդիրներ են առաջացել,-ասել է Էդուարդ Սարգսյանը:

Վերջինս նաև հավելել է, որ ունեն նաև արտադրանքի իրացման հետ կապված խնդիրներ: Արտադրված շաքարավազը իրացվում է հիմնականում Հայաստանում: Իսկ հարևան երկրներից միայն Վրաստան է արտահանվել մոտ 1500 տոննա:

-Գործարանի աշխատանքների ժամանակավոր դադարի պատճառը արտադրանքի իրացման նոր շուկաներ գտնելն է: Ներկայումս գործարանը պահեստավորած այնքան շաքարավազ ունի, որը Հայաստանը կսպառի մեկ տարվա ընթացքում՝ մոտ 22 հազ. տոննա,- ասել է Էդուարդ Սարգսյանը:

Դերենիկ Մալխասյան

Գյումրի