Լրագրողների հետ հանդիպման ժամանակ ՀՀ լեզվի պետական տեսչության պետի պաշտոնակատար Սերգո Երիցյանն ասել է, թե իրենց տեսչության ուսումնասիրությունները ցույց  են տալիս, որ շաբաթական առանվազն 3-4 խախտում է գրանցվում, իսկ  դատարան ընդամենը մեկ հայցով են դիմել, քանի որ գոյություն ունի նախադեպ հասկացողությունը, երբ մեկ անգամ պարտվելու դեպքում այլևս իմաստ չունի դիմել դատարան, այլ պետք է օրենսդրական փոփոխություններ կատարել։

-Այսօրվա խնդիրներից է հստակ լեզվաքաղաքականության մշակումը: Մենք նախատեսում ենք այդ առումով ծրագիր մշակել: Լեզվաշինությունն էլ է այսօր խնդիր: Ահավոր չափերի են հասել լեզվական խախտումները, խաթարումները: Դրանք եկել-հասել են այնպիսի չափերի, որ հին օրենքը դրա դեմն այլևս չի կարող առնել: Մշակվել է նոր օրենք, որը ներկայումս կառավարությունում է,-ընդգծել  է նա:

Սերգո Երիցյանը նաև նշել է, որ իրենք լուրջ ուսումնասիրություն են կատարել հայոց լեզվի դրվածքը դպրոցներում պարզելու նպատակով։

-Պարզ դարձավ, որ դպրոցներում սկսում են զանգվածային գրականություն չկարդալ: Խնդիր ունենք հայոց լեզվի դասավանդման ժամանակակից մեթոդների: Այլևս թուղթ  ու գրիչ, գրատախտակ հին մեթոդները չեն աշխատում: Պետք է հաշվի նստենք այսօրվա սերնդի պահանջների հետ։ Արձանագրել ենք մի վիճակ, որը տագնապալից է,-ընդգծել  է նա:

7or.am