ՀՅԴ խմբակցության պատգամավոր Արծվիկ Մինասյանը լրագրողների հետ հանդիպման ժամանակ պատասխանելով «7օր»-ի այն հարցին, թե որքանո՞վ է իրատեսական 2010թ. բյուջեի իրականացումը՝ ասել է, որ ոչ միայն պետական բյուջեն, այլև վարվող սոցիալ-տնտեսական ողջ քաղաքականությունը էական որևէ ձեռքբերում Հայաստանի և հայ ժողովրդի համար չեն կարող ապահովել։

-Կառավարությունը 2009-ի համար էլ էր կանխատեսում 9,2 % տնտեսական աճ։ Արդյունքում ի՞նչ ունեցանք՝ ուղիղ 27 % շեղում նրանից, ինչ որ ունեինք։ Հիմա էլ 1,2 %-ի մասին է խոսք գնում։ Եթե տեսնենք, թե ինչի վրա են կառավարության մոտեցումներն ու կանխատեսումները հիմնված և փորձենք համադրել մեր երկրի ներսում ունեցածի հետ, ապա կտեսնենք, որ դրանց միջև կապ չկա։ Կառավարությունն ամեն ինչ հիմնականում պայմանավորում է արտաքին աշխարհի զարգացումներով, ոչ թե ներքին տնտեսության առողջացման, մրցակցային կարգերի հաստատման, հակամենաշնորհային ակտիվ քաղաքականության իրականացման և տնտեսության մեջ պոտենցիալ ունեցող ճյուղերի խրախուսման քաղաքականությամբ,-նշել է նա։

Այն հարցին, թե ելնելով իրականությունից՝ որքանո՞վ է արդիական դառնում կառավարության հրաժարականի պահանջը, Արծվիկ Մինասյանը պատասխանել է, թե կառավարությունը վաղուց պիտի հրաժարական տար։

-Իմ անձնական կարծիքն եմ ասում և մի քանի անգամ էլ ասել եմ, որ այս կառավարությունը վաղուց պետք է հրաժարական տված լիներ։ Ինչքան ուշացնում է, այնքան մեր երկիրն ավելի վատ վիճակում է հայտնվում,-հավելել է նա։

7or.am