ՀՀ  Նախագահի  նստավայր

Պարոն  Ս.Սարգսյանին

Նախ, շնորհավորում եմ  հերթական  եվրոընտրության համար, քանի  որ  համոզված  եմ, որ  այն  Քո  Հաղթանակն  է:

Ակնհայտ  է  նաև, որ  արդեն  հիմնովին  ձևավորվել  է  ազգանվեր   մարդկանց  մի  հսկայական  բանակ, որը կարողանում  է  օր-օրի    նոր  որակ  հաղորդել   ՀՀ  ընտրական  գործընթացներին:

Իսկ, այս  ընտրությունն  առաջընթաց  է նախորդներից  նրանով, որ  այդ  մարդիկ  իրենց  գործողությունները  իրականացնում  էին  անհամեմատ  անթաքույց  և հրապարակային:

Օրինակ, երբ  Ն.Փաշինյանի  վստահված անձանց  և  դիտորդներին  դուրս  էին  շպրտում  ընտրատեղամասից, տեղամաս  էին  փակում  օրը  ցերեկով  կամ  ընտրացուցակներ  թաքցնում, այդ մասին    հպարտորեն  հայտարարում  էին,  անգամ,  ԶԼՄ-ներին:

Իսկ  երբ  գնացել  էի  թիվ  10-րդ  ԸԸՀ, հաճելիորեն  զարմացա, տեսնելով, թե  ինչ  բարձր    կազմակերպվածություն  է   տիրում  այդ   հանձնաժողովում: Նախ, երբ  ներս  մտա  թղթախաղով  էին  զբաղված, հետո  որոշեցին  հանձնաժողովի  նիստը  ընդմիջել  և  շամպայն  ըմպել  և, քանի  որ  ոչ  մի  դիտորդ, վստահված  անձ  և  ԶԼՄ-ի  ներկայացուցիչ   հրավիրված  չէր  դիմում-բողոքիս  քննարկմանը, վերջինս  անքան  ուշադիր  անցկացրեցին, որ  մոռացան  անգամ  նիստը  արձանագրել  և  քվեարկել  որոշում  ընդունելու  համար: ...

Սակայն,  առավել  գոհացուցիչ  է  ընտրության օրինականության պահապան  պետական  մարմինների  և  պաշտոնատար անձանց  աշխատանքը` ընտրության  վերջին  10  օրը  օրինական  անգործության մեջ  էին' ո'չ  դիմում-բողոքներին  էին  պատասխանում, ո'չ  ընտրողներին  ծանուցագրեր  ուղարկում, ո'չ  անճշտություններ  ուղղում, ո'չ  քարոչություն  էին կազմակերպում...

Գովասանքս առավել  տպավորիչ  դարձնելու  համար  բերում  եմ  քաղվածք  ՀՀ  Նախագահի  ներկայացուցիչ, ԿԸՀ   նախագահի  07.01.10թ.  թիվ  01-595  ինձ  հասցագրված  եվրոգրությունից, այն  է'

«...ԿԸՀ  31.12.09թ.  թիվ  101-Ա որոշմամբ  հանձնաժողովում  սահմանվել  է   հերթապահություն, ինչն  ամենևին  չի  նշանակում, որ հանձնաժողովի  և  աշխատակազմի  համար  2010թ.  հունվարի  1-ից  10-ն  աշխատանքային  են  և  նրանք  պարտավոր  են  աշխատանքային  օրերի  համար  նախատեսված  ողջ  ծավալով  իրականացնել  ՀՀ  օրենսդրությամբ  սահմանված   իրենց  գործառույթները, մասնավորապես' ս.թ. հունվարի  5-ի   դիմումի  հիման  վրա  լրացում  կատարել  կազմակերպության  դիտորդական  առաքելություն  իրականացնող անձանց  ցուցակում  և  նրանց տրամադրել  համապատասխան  վկայականներ:

Հորդորում  եմ  հետայսու  Ձեր  աշխատանքները  կազմակերպելիս  հաշվի  առնել  վերը  նշվածը  և  առաջնորդվել  ողջամտության  սկզբունքով:

Ինչ  վերաբերում  է  25.12.09թ.  դիմումի հիման  վրա  կազմակերպության  դիտորդական  առաքելություն  իրականացնող  անձանց  ցուցակում  լրացում  կատարելուն, ապա  տեղեկացնեմ, որ  դիմումը  հանձնաժողովում  մուտքագրվել  է  28.12.09թ., պատասխանը'  33  վկայականներով  Ձեզ  առաքվել  է  30.12.09թ.»:

 Այսինքն,  ՀՀ  Նախագահի  ներկայացուցիչը  կամ, որ  նույնն  է  ՀՀ  Նախագահն, ինձ  հորդորում  է  ողջամտորեն  չղեկավարվել  ՀՀ  օրենդրության  պահանջներով  և  չանհանգստացնել  իրեն  և  իր գործընկերներին  տոնական  օրերին, առավել  ևս, որ  Հայփոստն  էլ  չի  աշխատել       31.12.09թ.-ից  մինև  11.01.10թ.-ը:

Թերևս  սա  է պատճառը, որ  այսօր  ես  ստացել  եմ  մի  շարք  դիմում-բողոքների  պատասխաններ, ինչպես նաև  33  դիտորդների  վկայականներ, որոնք  հարկավոր  են  երկու  օր  առաջ  ավարտված  ընտրությունները  դիտարկելու  համար:

   Այո', արդեն  ավարտված  ընտրության  համար:

Այնպես, որ  շնորհակալություն  եմ  հայտնում  բարձր  մակարդակի  ընտրության  կազմակերպման  համար և, հասկանալի  պատճառներով, կից  վերադարձնում  եմ  ՀՀ  Նախագահի  ներկայացուցչից  կամ, որ նույնն  է  ՀՀ  Նախագահից   այսօր  ստացած  բոլոր  փաստաթղթերը:

Միաժամանակ, խորհուրդ եմ տալիս, պետական  բարձր  պարգևներ  հանձնելիս  հիշել  նաև  մեր  բազմամյա  եվրոընտրակազմակերպիչներին:  

Հարգանքներով`

«ԳԽ-պ/ակումբ»  ՀԿ  նախագահ  Ռուբեն Թորոսյան