Անհատական տաքսիների վերաբերյալ օրենքի կիրառումը, որ նախատեսում էր նոր հարկային ռեժիմ տաքսու վարորդների նկատմամբ, հնարավոր է, որ Գյումրիում կրկին բողոքի հրապարակային ակցիաների տեղիք տա: Նշենք, որ օրենքի կիրառումն անհատ տաքսու վարորդների ինտենսիվ բողոքի ակցիաների պատճառով կասեցվել էր մինչև 2009թ. դեկտեմբերի 31-ը:

Գյումրիում անհատ տաքսու վարորդներն սպասում են նոր օրենքով ամեն վայրկյան տուգանվելուն:

Տաքսու վարորդ Գրիգոր Ստեփանյանն ասում է. «Մեր տղաներից մեկն ասաց, որ հունվարի 11-ից օրենքը կիրառվելու է, սակայն դեռևս մեզ ձեռք չեն տալիս»:

Հարցին, թե օրենքի կիրառության դեպքում կրկին դիմելո՞ւ են բողոքի ակցիաների, վարորդը պատասխանել է. «Իհարկե, ստիպված. ի՞նչ կարող ենք անել: Հակառակ դեպքում գործազուրկ ենք դառնալու. մեր ընտանիքներն ո՞վ է պահելու»:

Մեկ այլ անհատ տաքսու վարորդ Արմեն Վարդանյանը նույն հարցի վերաբերյալ ասել է. «Առավոտվանից սպասում ենք՝ ուր որ է՝ տուգանելու են։ Կարող է՝ հենց հիմա հաճախորդ սպասարկեմ, ու ինձ տուգանեն: Խոսակցություններ կան, որ վաղվանից են օրենքը կիրառելու, դե մենք էլ պատրաստվում ենք»:

Իսկ  Շիրակի մարզպետարանի տրանսպորտի և ճանապարհաշինության բաժնի պետ Խաչիկ Խնձրցյանն օրենքի կիրառության վերաբերյալ «7օր»-ին փոխանցել է հետևյալը. «Մենք դեռևս որևէ հանձնարարական չենք ստացել, և որևիցե գործողություն չի ձեռնարկվել, սակայն ասեմ, որ օրենքը կասեցվել էր մինչև 2009թ. դեկտեմբերի 31-ը»:

Դերենիկ Մալխասյան

Գյումրի