Թուրքիայի և Իսրայելի միջև նոր լարվածություն է հասունանում։ Պաշտոնական Անկարան խստորեն քննադատել է Իսրայելի խորհրդարանի այն որոշումը, որով պաշտոնական կարգավիճակ է տրվում Պաղեստինի տարածքում գտնվող, սակայն Իսրայելի կողմից օկուպացված բնակավայրերին: Այս մասին հայտնում է «ermenihaber.am»–ը՝ «Milliyet»–ին հղումով։

Թուրքիայի արտգործնախարարության պաշտոնական կայքում հրապարակված հայտարարության մեջ, մասնավորապես, ասված է. «Մենք խստորեն դատապարտում ենք Իսրայելի խորհրդարանի՝ պաղեստինցիներին պատկանող տարածքներում կառուցված շուրջ 4000 բնակելի կառույցներին պաշտոնական կարգավիճակ տալու մասին որոշումը»:

Ըստ Թուրքիայի ԱԳՆ-ի՝ նշված կառույցներն ապօրինի են, իսկ դրանց վերաբերյալ ընդունված որոշումը հակասում է ՄԱԿ-ի անվտանգության խորհրդի՝ 2016թ. դեկտեմբերի 23-ին ընդունված համար 2334 որոշմանը:

Աղբյուրը հիշեցնում է, որ թուրք-իսրայելական դիվանագիտական հարաբերությունները խաթարվել էին 2010թ.՝ թուրքական «Մավի Մարմարա» նավի վրա իսրայելցի զինվորների հարձակման պատճառով: Երկու երկրների միջև դիվանագիտական կապը վերականգնվեց միայն այն բանից հետո, երբ Իսրայելը 2016թ. ներողություն խնդրեց Թուրքիայից և համաձայնեց փոխհատուցում վճարել հարձակման ժամանակ զոհված Թուրքիայի քաղաքացիների ընտանիքներին: