Քիչ առաջ մեկնարկել է Լյուդմիլա Սարգսյանի ղեկավարած Սոցիալ-Դեմոկրատ Հնչակյան կուսակցության 7-րդ հանագումարը, որն անց է կացվում ՀԱԿ Էրեբունի համայնքի տարածքային գրասենյակում։ Համագումարը կազմված է երկու մասից՝ հանդիսավոր բացում և աշխատանքային մաս։ ԶԼՄ ներկայացուցիչներին թույլատրվելու է ներկա գտնվել համագումարի միայն առաջին մասին։ Համագումարում ակնկալվում է Հայ ազգային կոնգրեսի առաջնորդ Լևոն Տեր-Պետրոսյանի ելույթը։ Թվով 50 պատվիրակներ՝ ՍԴՀԿ Արարատի, Արմավիրի, Տավուշի, Լոռու, Կոտայքի, Գեղարքունիքի և Երևանի մարզային կառույցներից ու բջիջներից կընտրեն կուսակցության նոր կենտրոնական վարչություն, որն էլ կընտրի ատենապետ։ ՍԴՀԿ համագումարին ներկա են ՀԱԿ բազմաթիվ ներկայացուցիչներ, այդ թվում և Լևոն Տեր-Պետրոսյանը։ Ի դեպ, այսօր վերջինիս ծննդյան օրն է։

Հիշեցնենք, որ նախորդ տարվա դեկտեմբերի 16-ին տեղի էր ունեցել ՍԴՀԿ արտահերթ համագումարը, որում ընտրվել էր կուսակցության նոր կենտրոնական վարչություն և ատենապետ։ Լյուդմիլա Սարգսյանը հայտարարել էր, որ այդ համագումարն ու դրանում կայացրած որոշումները անօրինական են։ Երեկ հակառակ կողմը նույնաբովանդակ հայտարարություն էր տարածել այսօր տեղի ունեցող ՍԴՀԿ համագումարի վերաբերյալ։