Թուրքիայի խորհրդարանում սահմանադրական փոփոխությունների վերաբերյալ նախագծի քննարկումները, որոնք ներառում են կառավարման խորհրդարանական համակարգից անցում նախագահականին և զգալիորեն ընդլայնում երկրի նախագահի լիազորությունները, թեժ մթնոլորտում են անցնում։ Այս անգամ կռվի են բռնվել կանայք:

CNN-ի թուրքական ծառայության փոխանցմամբ՝ անկուսակցական պատգամավոր Այլին Նազլըաքան ինքն իրեն ձեռնաշղթայել է Մեջլիսի ամբիոնի խոսափողից և մոտ երկու ժամ բոյկոտել խորհրդարանական քննարկումները:

Իշխող «Արդարություն և զարգացում» կուսակցության կին պատգամավոր Գյոքչեն Օզդողան Էնչը փորձել է բռնի ուժով հանել Այլին Նազլըաքանի ձեռնաշղթաները, ինչի ընթացքում կռիվ է սկսվել քրդամետ Ժողովրդադեմոկրատական կուսակցության և իշխանամետների կին պատգամավորների միջև: Ծեծկռտուքին միջամտել են նաև ընդդիմադիր քեմալականները:

Կատարվածի հետևանքով մեջլիսի փոխխոսնակ, քրդամետ պատգամավոր Փերվին Բուլդանը տեղափոխվել է հիվանդանոց: Իսկ Ժողովրդահանրապետական կուսակցության պատգամավոր Շաֆաք Փավեի ձեռքի պրոթեզը դուրս է եկել:

7or.am