ԱԺ ՀՀԿ խմբակցության քարտուղար Էդուարդ Շարմազանովը լրագրողների հետ հանդիպման ժամանակ ամփոփելով 2009թ.-ն՝ այն համարել է շատ հագեցած, միևնույն ժամանակ՝ բավական բարդ տարի թե՛ կուսակցության, թե՛ ընդհանրապես պետության համար։ Խոսելով ֆինանսատնտեսական ճգնաժամի մասին՝ նա ասել է, որ դա անխուսափելի էր, և ամբողջ աշխարհին էր սպառնում ճգնաժամը, բայց, ըստ իրեն, ավելի կարևոր էր կանխարգելել, քան ապաքինել վերքը, և հենց այդ ճանապարհով էլ գնացել է Տիգրան Սարգսյանի կառավարությունը և Սերժ Սարգսյանի թիմը։ Նա նշել է, որ իր կարծիքով հնարավոր եղավ զերծ մնալ ավելի վատ հետևանքներից։ Նա նաև նշել է, որ երբ Սերժ Սարգսյանը հայտարարել էր, որ երկրում պետք է հանդուրժողականության և համերաշխության մթնոլորտ տիրի, իր կարծիքով այդ ասածին համարժեք քայլ էր լայնամասշտաբ համաներումը։ Բացի այդ, նա ասել է, որ Երևանի քաղաքապետի ընտրությունները չի կարելի իդեալական համարել, բայց առաջ քայլ էր, որ բոլոր թեկնածուներն էլ ունեին հավասար հնարավորություններ, և մեծ ուրախություն է հայտնել, որ այս անգամ էլ ընտրողները Հանրապետական կուսակցությանն են  ձայների մեծամասնությունը տվել։

7or.am