ՌԴ վարչապետ Դմիտրի Մեդվեդևի հետ պաշտոնական հանդիպումից հետո կայացած մամուլի ասուլիսի ժամանակ Թուրքիայի վարչապետ Բինալի Յըլդըրըմը հայտնել է, որ Ռուսաստանն ու Թուրքիան պատրաստվում են ընդլայնել երկու երկրների համագործակցության շրջանակները։ Ինչպես տեղեկացնում է «Միլլեթը», բանակցությունների ընթացքում թուրքական կողմը Ռուսաստանի հետ ռազմատեխնիկական ոլորտում համագործակցության վերաբերյալ նոր համաձայնություն է ձեռք բերել:

«Մենք չենք խոսել հստակ նախագծերի շուրջ, այլ ընդհանուր առմամբ քննարկել ենք բոլոր այդ հարցերը: Երկու կողմերի համար էլ ակնհայտ է, որ մեր հարաբերությունների զարգացումն այլևս անհրաժեշտություն է: Մեր ռուս գործընկերների հետ պայմանավորվածություն ենք ձեռք բերել վերականգնել այն ամենը, ինչ բաց ենք թողել մեկ տարի առաջ տեղի ունեցած ցավալի դեպքից մինչ օրս»,-ասել է Յըլդըրըմը։

Նա հավելել է, որ դրանցից են նաև խոշոր էներգանախագծերը, ինչպես նաև պաշտպանության և տիեզերական ոլորտում համատեղ գործունեության նոր հեռանկարներ:

Ավելի վաղ ՌԴ վարչապետ Դմիտրի Մեդվեդևը հայտարարել էր, որ Թուրքիան և Ռուսաստանն, անկախ տեղի ունեցած տհաճ միջադեպերից, պետք է աշխատեն երկկողմ հարաբերությունների զարգացման ուղղությամբ և արագացնեն իրենց տեմպերը համատեղ նախագծերի իրականացման հարցում:

«Օբյեկտիվ և սուբյեկտիվ որոշ պատճառներից ելնելով՝ երկու երկրների առևտրային հարաբերություններում որոշակի կանգ գրանցվեց, սակայն կարծում ենք, որ պետք է միասին իրականացնենք մի շարք ընդհանուր և մեծ նախագծեր: Այսօրվա հանդիպումների առանցքային թեման տնտեսական և մշակութային ոլորտներին նոր թափ հաղորդելն է»,-ասել էր Մեդվեդևը:

Նա նաև տեղեկացրել էր, որ Ռուսաստանի Դաշնության և Թուրքիայի նախագահներ Վլադիմիր Պուտինի ու Ռեջեփ Թայիփ Էրդողանի բանակցությունները նախատեսված են 2017–ի առաջին կիսամյակում:

7or.am