«Հայ ազգային կոնգրեսի» ներկայացուցիչ Դավիթ Շահնազարյանը «Հայացք» ակումբում ասել է, որ Հայաստանի իշխանություններն արդեն հասկացել են, թե ինչի է հանգեցրել Թուրքիայի հետ նախաձեռնողական քաղաքականություն սկսելու «իրենց արկածախնդրությունը»։

-Իշխանությունները հիմա մտածում են՝ ի՞նչ ձևերով անեն, որ և՛ ինչ-որ կերպ հրաժարվեն այս արձանագրություններից, և՛ չարժանանան միջազգային հանրության բացասական վերաբերմունքին։ Առայժմ իրենք լուծում չունեն. փնտրտուքի մեջ են,- ասել է ՀԱԿ անդամը՝ բացառելով, որ ԱՄՆ-ը դեպքերի յուրաքանչյուր զարգացման պարագայում ճանաչի Հայոց ցեղասպանությունը։

Դ. Շահնազարյանը նաև կասկածում է, որ դրսի ուժերի կողմից չափազանց կաշկանդված ՀՀ իշխանություններն այնքան ինքնուրույնություն կունենան, որ կկարողանան դուրս գալ «իրենց իսկ ստեղծած ծանր, անհեթեթ վիճակից»։

Սահմանադրական դատարանն էլ, ըստ Դ. Շահնազարյանի, Հայաստան-Թուրքիա արձանագրությունները չի ճանաչի հակասահմադրական.

-Եթե Գագիկ Հարությունյանին հրահանգեն հակասահմանադրական ճանաչել այս փաստաթուղթը, նշանակում է, որ Սերժ Սարգսյանը պետք է ընդունի, որ ինքն արտգործնախարարի հետ անգրագետ է և Սահմանադրությանը հակասող փաստաթուղթ է ստորագրել։

7or.am