Գերմանիայի արդարադատության նախարար Հեյկո Մաասը հայտարարել է, որ «գյուլենական համայնքին» անդամակցելու մեջ մեղադրվող փախստական դատախազներ Զեքերիա Օզը և Ջելալ Քարան չեն հանձնվի Թուրքիային:

«ermenihaber.am»–ի փոխանցմամբ՝ դա զայրացրել է Թուրքիայի նախագահ Ռեջեփ Թայիփ Էրդողանին: Նրա բնորոշմամբ՝ Գերմանիայի կողմից արվող այդ տեսակ հայտարարությունները մտահոգություն են առաջացնում:

«Ահաբեկչությունը բումերանգի պես կշրջվի և ձեզ էլ կհարվածի: Ահաբեկիչներին գրկաբաց ընդունող Գերմանիայի վերջը լավ չի լինելու: Գերմանիան վերածվել է գյուլենականների ետնաբակի: Մենք էլ դրանից ենք անհանգստացած»,- արձագանքել է Էրդողանը:

Աղբյուրը հիշեցնում է՝ 2015թ. մայիսին պաշտոնանկ արված դատախազներ Զեքերիա Օզը և Ջելալ Քարան մեղադրվում են Ֆեթհուլլահ Գյուլենի հետ սերտ կապեր ունենալու մեջ: 2015թ. օգոստոսին թուրքական դատարանը նրանց ձերբակալելու որոշում էր կայացրել, սակայն դատախազներին հաջողվել էր մինչ այդ դուրս գալ երկրից։

Մանրամասն՝ սկզբնաղբյուր կայքում։