Նոյեմբերի 2–ին 2017թ. պետական բյուջեի քննարկման ժամանակ ֆինանսների փոխնախարար Ատոմ Ջանջուղազյանը հայտարարել է, որ 2017թ. սոցիալական պաշտպանության ոլորտի ծախսերը կազմելու են 408 985,8 մլն դրամ։

–Բյուջեի մոտ 30%–ը հատկացվում է սոցիալական պաշտպանության ոլորտին,– տեղեկացրել է նա՝ նշելով, որ ծախսերը 2016 թ. պետական բյուջեի նկատմամբ ավելանում են 1 927.8 մլն դրամով, ինչը պայմանավորված է կուտակային համակարգի մասնակիցների թվաքանակի աճով։

Փոխնախարարի խոսքով՝ 2017 թ. պահպանվելու են 2016 թ. համար նախատեսված երեխայի ծննդյան միանվագ նպաստի չափերը։ Առաջին և երկրորդ երեխայի ծննդյան դեպքում՝ 50 հազար դրամ, երրորդ և չորրորդ երեխաների դեպքում՝ 1 մլն դրամ, իսկ հինգ և ավելի երեխայի ծննդյան դեպքում՝ 1.5 մլն դրամ։

«Շարքային զինծառայողների և նրանց ընտանիքների անդամների կենսաթոշակներ» ծրագրով նախատեսվում է 634.9 մլն դրամի չափով ծախս: «Կուտակային կենսաթոշակային համակարգի ներդնում» ծրագրով նախատեսվում է 28 688.1 մլն դրամի ծախս։

«Ծերության, հաշմանդամության, կերակրողին կորցնելու դեպքում սոցիալական նպաստներ» ծրագրով նախատեսվում է 13 958.5 մլն դրամի չափով ծախս: «Երեխայի ծննդյան միանվագ նպաստ» ծրագրով նախատեսվում է 9 550.7 մլն դրամի չափով ծախս:

7or.am