«Նովոստի» միջազգային մամուլի կենտրոնում թուրք լրագրողների Հայաստան կատարած այցի արդյունքների մասին խոսելիս թուրքագետ Արտակ Շաքարյանը նշել է, որ թուրք լրագրողները հիմնականում նշում էին, որ Լեռնային Ղարաբաղի հարցում իրենք արմատական փոփոխություն չեն ուզում, չեն ուզում նույնիսկ ազատագրված տարածքներից որևէ հատվածի փոխհատուցում, ուղղակի Թուրքիային մի սիմվոլիկ ժեստ է հարկավոր, թեկուզև մոսկովյան ևս մեկ հռչակագրի ստորագրում, որը ցույց կտա, որ գործընթացը շարունակվում է։ Նրա կարծիքով այցի շնորհիվ ավելի պարզ դարձավ, թե հայ-թուրքական արձանագրությունները Թուրքիայում ինչպես են ընկալվում և դիտարկվում։

-Եթե մինչ այժմ մենք Էրդողանի հայտարարություններից էինք իմանում, որ Ղարաբաղի հարցը փորձում են մտցնել, հիմա մենք գիտենք, որ իրականում դա ներքաղաքական խնդիրների արդյունք է, որ Ղարաբաղի հարցը, մենք ուզենք, թե չուզենք, Անկարան կապում է հայ-թուրքական զարգացումների հետ։ Թուրքերն իմացան նաև Հայաստանի պաշտոնական դիրքորոշումը, որ հունվարը մեզ համար ոչ թե վերջնաժամկետ է, այլ Անկարան թող իմանա, որ հունվարից սկսած ամեն օր ավելի բարդ է լինելու վավերացման համար,- ընդգծել է Արտակ Շաքարյանը՝ ավելացնելով, որ Թուրքիան սպասում է հունվարի 12-ի ՀՀ Սահմանադրական դատարանի որոշմանը և արձանագրությունները քննարկման է դնելու հունվարի վերջին  կամ փետրվարի սկզբին։

Նրա կարծիքով Թուրքիայում բոլորը գիտակցում են, որ ապրիլի 24-ը հոգեբանական «ամենավերջնաժամկետն» է, և եթե մինչև ապրիլի 24-ը Թուրքիան չվավերացնի արձանագրությունները, դրանից հետո շատ ավելի բարդ կլինի թե՛ Թուրքիայի, թե՛ Հայաստանի համար՝ մասնավորապես հաշվի առնելով Թուրքիայում 2011թ. խորհրդարանական ընտրությունները, քանի որ քարոզարշավի օրերին հայկական օրինագծի վավերացումը քաղաքական ինքնասպանություն է։

7or.am