Չինաստանում տեղի ունեցած G20 գագաթաժողովը ՌԴ առաջնորդ Վլադիմիր Պուտինի և Թուրքիայի նախագահ Ռեջեփ Թայիփ Էրդողանի համար դարձավ հաղթական վերադարձ դեպի միջազգային հարթակ։ Այս մասին հայտնում է «Le Monde»–ը։

Ինչպես նշվում է, եթե նախորդ 2 G20 գագաթաժողովների ընթացքում Վլադիմիր Պուտինն ավելի մեկուսացած էր Ուկրաինայում տեղի ունեցած նախորդ իրադարձությունների պատճառով, ապա Հանչժոու քաղաքում նա անփոխարինելի զրուցակից էր։ Այսպես, պետության ղեկավարը նոր հուն է տվել Սաուդյան Արաբիայի հետ ընթացող բանակցություններին, որոնք առաջ էին քաշվել նախորդ գագաթաժողովին։

«Ակնհայտ է, որ այս գագաթաժողովը ռևանշ է Պուտինի համար։ Նա մի իրավիճակում է, երբ բոլորը նրան են փնտրում»,–հաղորդել է գագաթաժողովին ներկա դիվանագետներից մեկը։

Ինչ վերաբերում է Էրդողանին, ապա սա նրա առաջին միջազգային բանակցություններն էին Թուրքիայում տեղի ունեցած չհաջողված ռազմական հեղաշրջման փորձից հետո, որի հետևանքով վատացել էին հարաբերություններն Արևմուտքի հետ։ Գագաթաժողովի ընթացքում Էրդողանը պնդել է Թուրքիայի և Սիրիայի սահմանին բուֆերային գոտի ստեղծելու իր նախագիծը։

7or.am