FETÖ կազմակերպության նախկին համակարգողը, որի առաջնորդին համարում են Թուրքիայում պետական հեղաշրջման փորձի գաղափարական ոգեշնչող, պատմել է, թե ինչպես էր Ֆեթհուլլահ Գյուլենը համակարգում իր ուղեկիցների աշխատանքները նախկին ԱՊՀ–ի երկրներում և Կովկասում։

Նախկինում Գյուլենի կարևոր ներկայացուցիչներից մեկի՝ Հայաթի Քյուչուքի խոսքերով՝ թուրք ընդդիմադիրը հրապարակայնորեն սպառնացել էր Ադրբեջանի իշխանություններին, խոստացել անգամ Կասպից ծովը նետել նախագահ Իլհամ Ալիևին։ Այս մասին նա պատմել է թուրքական «Sabah» թերթի հետ հարցազրույցի ընթացքում։

«Փենսիլվանիայում ժողովի ընթացքում Գյուլենին զանգահարել էին Ադրբեջանից և բողոքել, որ Իլհամ Ալիևը ճնշում է գյուլենականներին, խանգարում է նրանց նորմալ գործունեությանը։ Ֆեթհուլլահ Գյուլենը պատասխանել է հետևյալը՝ «Թող չստիպեն ինձ նրան Կասպից ծովը նետել»,– պատմել է Հայաթի Քյուչուքը։

Նրա խոսքերով՝ Ադրբեջանի սահմանում թաքուն գործունեություն են իրականացնում բազմաթիվ գյուլենականներ։ Նրանց նախկին գործընկերը վախենում է, որ Ալիևի հրաժարականից հետո Ադրբեջանը ամբողջությամբ կհայտնվի FETÖ–ի ձեռքում։

«Միայն «մեկ ժողովուրդ՝ 2 պետություն» սկզբունքով գործելու դեպքում կկարողանանք դեն նետել այդ ահաբեկիչներին աղբանոցը»,–հավելել է Քյուչուքը։

7or.am