xnews.am–ի հարցազրույցը ՀՀ ԱԺ պատգամավոր, «Համախմբում» կուսակցության փոխնախագահ Էլինար Վարդանյանի հետ

-Ինչպե՞ս եք վերաբերվում կառավարության որոշմանը` կասեցնել քաղծառայողների սոցիալական փաթեթների հանգստի բաղադրիչը: Սա արդյոք չի՞ բերի առանց այն էլ դժվար սոցիալական վիճակի վատթարացմանը:

-Շատ մտահոգիչ իրավիճակ է: Ո՛չ պատճառաբանությունն էր համոզիչ, ո՛չ նպատակը: Տպավորությունն այնպիսին է, որ անկեղծ չեն: Կառավարությունը կարծես թե լավ չի պատկերացնում, թե ինչ սոցիալական պայմաններում են ապրում քաղծառայողները և ընդհանրապես ՀՀ քաղաքացիները: Իսկ իրականությունն այն է, որ հարյուր-հազարավոր կրթված մարդիկ հոգնել են անարդարացի վատ, մի կերպ ապրելուց: Ու խոսքն աշխատող մարդկանց մասին է: Մեզ լրջորեն մտահոգում է նաև Հարկային նոր օրենսգիրքը, որը է՛լ ավելի է վատացնելու բիզնես միջավայրը և է՛լ ավելի է խթանելու արտագաղթը: Սա էլ արդեն հարվածի տակ է պետական համակարգից դուրս աշխատող այլ հարյուր հազարների: Արդեն չգիտես` սա միտումնավոր քաղաքականություն է, թե ուղղակի համընկում:

-Ի դեպ, Հովիկ Աբրահամյանը ևս մեկ աղմկահարույց հայտարարություն արեց կրթության համակարգի վերաբերյալ, կարծես թե մոռանալով, որ համակարգի պատասխանատուն վերջին երկար տարիներին իրենց կուսակցությունն է եղել:

-Կրթական համակարգին վերաբերող շեշտադրումները ճիշտ էին: Դժվար է չհամաձայնել: Հովիկ Աբրահամյանը խոսեց նաև բուհերի կառավարման խորհուրդների ձևավորման խնդրի մասին: Հարցադրումը ճիշտ էր:

-Այդ դեպքում, արդյոք, դրան տրամաբանորեն չպետք է հետևի, որ Հ. Աբրահամյանն առաջինը հրաժարվի Տնտեսագիտական համալսարանի կառավարման խորհրդի նախագահի պաշտոնից:

-Կարծում եմ, այո, ու նույնը պետք է պահանջի իր նախարարներից ու այլ ՀՀԿ-ական պաշտոնյաներց: Պարզ չէ՞, որ վարչապետը չունի ժամանակ` բուհի կառավարման խորհուրդ ղեկավարելու: Դրանք ձևական են: Դրանք վեր են ածվել ՀՀԿ-ի շահերը սպասարկող միավորների: Դրանք ոչ մի կապ չունեն բուհերի ինքնավարության հետ: Ինչ է` ՀՀԿ- ից դուրս ուրիշ խելացի մարդիկ չկա՞ն, ուրիշ մենեջերներ չկա՞ն, ուրիշ մասնագետներ չկա՞ն: Տեսնենք, թե ինչ քայլեր կհետևեն:

-Դուք ընտրվել եք «Համախմբում» կուսակցության փոխնախագահ: Եթե շատ համառոտ` ո՞րն է «Համախմբման» տարբերությունը այլ ուժերից:

-Եթե շատ կարճ` մենք ձգտելու ենք նոր մշակույթ ներմուծել հայաստանյան քաղաքականություն: Թող վերամբարձ չհնչի, բայց մենք հենց դա ենք ուզում` նոր մտածողություն, թարմ օդ: Մենք չենք մասնակցելու ընդդիմադիր, ավելի ընդդիմադիր ամենաընդդիմադիր մրցավազքին: Հաջորդ տարբերությունը. մենք մեկ կամ լավագույն դեպքում 1.5 հոգանոց կուսակցություն չենք ստեղծել` աղմկելու կամ սպասարկելու որևէ մեկի շահերը: Եթե նկատել եք` մենք որևէ քաղաքական ուժի վրա չենք հարձակվում, չենք վիրավորում:

-Բայց կարծես թե չեք էլ համագործակցում:

-Հայաստանի քաղաքական դաշտում նույնիսկ համագործակցության գաղափարն է արժեզրկված, խեղված: Եթե խոսքը գործարքային համագործակցության մասին է, կամ պատվիրված համագործակցության, ապա այո, մենք չկանք այդտեղ: Բայց ծրագրային մոտեցումների, ընթացիկ կոնկրետ խնդիրների շուրջ մենք հաջողությամբ աշխատում ենք, համագործակցում ենք այլ ուժերի հետ: Եվ հենց համատեղ աշխատանքի ընթացքում ենք փորձում հասկանալ բնական դաշնակիցների հնարավորությունը:

-Մամուլում արդեն տեսակետներ ենք հնչում, թե «Համախմբումը» ընտրությունների գնալու է այս կամ այն ուժի հետ` դաշինքով;

-Իսկ ո՞վ է որոշել դա: Ուղղակի չկա նման անձ կամ ուժ, որը կարողանա նման որոշում կայացնել: Այդ որոշումը կայացնելու է կուսակցության ղեկավար մարմինը, այդ թվում ես` որպես կուսակցության փոխնախագահ, իմ ընկերները, վարչության անդամները, որոնք բոլորը կայացած ու ինքնաբավ մարդիկ են: Կգա ճիշտ պահը, և բոլոր փաստարկները հաշվի առնելով, իրական հանգամանքները հաշվի առնելով` կկայացվի որոշումը:

-Դուք խոսեցիք քաղաքական նոր մշակույթի մասին: Կարո՞ղ եք թեկուզ մեկ օրինակով բացել փակագծերը:

-Մենք խնդիր ենք դրել` մեր առջև բոլոր կարևորագույն հարցերի վերաբերյալ, մարդկանց հուզող, հետաքրքրող բոլոր խնդիրների վերաբերյալ ձևակերպել կուսակցության հստակ ու հասկանալի տեսակետները, այդ թվում` Ղարաբաղի խնդրի: Մենք ամեն ինչ անելու ենք, որ ստեղծվի այնպիսի մթնոլորտ, որ բոլոր հիմնական կուսակցությունները հստակ ներկայացնեն իրենց տեսակետները: Մենք փորձելու ենք ստեղծել մթնոլորտ, որտեղ կարծիք ու տեսակետ չունենալը այլևս հնարավոր չլինի քողարկել ճվճվոցով: Որ ԱԺ ամբիոնից կամ մամուլում մի բան ասեն, իշխանության միջանցքներում լրիվ այլ բան պայմանավորվեն: Եվ այդպես 1.5 հոգանոց ուժերը կամ ֆեյք կուսակցությունները, որոնց իշխանությունը բուծում է աշնանացանի տեմպերով, ուղղակի կկորցնեն իրենց իմաստը:

-Համախմբման գրասենյակ էր վերջերս այցելել ԱՄՆ դեսպան Մայլսը: Դուք հանդիպմանը ներկա էիք: Կբացե՞ք փակագծերը:

-Քննարկել ենք տարբեր հարցեր: Դեսպանին հետաքրքրում էին մեր մոտեցումները լայն հարցերի շուրջ: Անկեղծ զրույց էր: Բայց մի բան անպայման ուզում եմ ընդգծել` «Համախմբումը» երբեք դեսպանների և միջազգային կառույցների ղեկավարների հետ հանդիպումները շատ-շատերի նման չի օգտագործում և չի օգտագործելու` սեփական երկիրը փնովելու կամ իշխանությունների վրա «գործ տալու» համար: Դա մեզ համար սկզբունքային է: Ի դեպ, սա նույնպես նոր քաղաքական մշակույթի բաղադրիչներից է: Մենք ունենք բավարար մտավոր ռեսուրս և հանրային վստահության պաշար` իշխանությանը երկրի ներսում հակադրվելու և այլընտրանքային ծրագրեր և տեսակետներ ներկայացնելու:

-Դուք որպես ծրագրային կետ նշեցիք Ղարաբաղի խնդիրը, արդյո՞ք դա է լինելու ձեր ծրագրի հիմնական առանցքային կետը:

-Ղարաբաղի խնդիրը, մեր պետության անվտանգության խնդիրն իսկապես լինելու է կարևոր կետ մեր ծրագրում, և մենք իսկապես կարևորում ենք, որ բոլոր հիմնական քաղաքական ուժերը հստակ ներկայացնեն իրենց տեսակետը: Սա, ի դեպ, չի թուլացնում իշխանությանը բանակցությունների ժամանակ: Սա հակառակը` ուժեղացնում է իշխանություններին, տալիս է մանևրելու տեղ: Ես վստահ եմ, որ իշխանության մեջ կան մարդիկ, ովքեր սա հասկանում են, և նույնքան վստահ եմ, որ կան մարդիկ, որոնք սա չեն հասկանում, և նրանց հոգեհարազատ է լուռ համաձայնությունն ու գորշ խոնարհումը: Եթե քաղաքական ուժն ունենում է ձևակերպված տեսակետ, ապա այն ունենում է նաև պատասխանատվության զգացում: Ղարաբաղի հարցում, անվտանգության հարցում և մի քանի այլ կարևորագույն հարցերում չի կարող լինել փոքր քաղաքական, կուսակցական շահ: «Համախմբումը» կանի ամեն ինչ` պետության շահը վեր դասելու, պաշտպանելու համար: Իշխանության հետ հակադրությունը մեզ համար չի նշանակում պետականությանն առնչվող կարևորագույն հարցերում սպասել իշխանության սխալին կամ դժվարություններին:

-Կա՞ն արդյոք խոչընդոտներ կուսակցության գործունեության համար, ինչը Հայաստանում սովորաբար լինում է:

-Կարծում եմ` ոչ: Որևէ արհեստական խոչընդոտ այս պահին չկա: Աշխատանքները նորմալ գնում են: Կա լրատվական շրջափակման միտում: Մեզ համար փակ է հեռուստաընկերությունների մեծ մասը: Մեծ թիվ են կազմում լրատվական կայքերում մեզ վերաբերող սուտ լուրերի քանակը, ուղղորդված հարցերը: Մի հեռուստահաղորդում կա` վարողը բոլոր հյուրերին հարցնում է «Համախմբման» մասին, որ քննադատություն կամ թերահավատություն պոկի նրանցից: Սա և պարկեշտ չէ, և պարզունակ է: Դրա փոխարեն գոնե մեկ անգամ կարելի է հրավիրել «Համախմբման» ներկայացուցչին և առանց հայտնի շենքի հայտնի մարդու մոնտաժի լսել բոլոր պատասխանները: Ցավոք, սա է հայաստանյան ազատ խոսքի խաղի կանոնները:

Մանրամասները՝ xnews.am–ում։