Հանրային խորհրդի պետաիրավական հարցերի հանձնաժողովի նախագահ Գրիգոր Բադիրյանը «Նովոստի» մամուլի կենտրոնում «7օր»-ին ասել է, որ թե՛ որպես ՀԽ անդամ, թե՛ որպես ՀՀ քաղաքացի, անհատ և իրավաբան, հայ-թուրքական կարգավորման ներկա գործընթացի վերաբերյալ թեև իր կարծիքն ունի, սակայն նախընտրել է ձեռնպահ մնալ այն հրապարակավ հայտարարելուց՝ պատճառաբանելով, թե դա իր մասնագիտական շջանակներից դուրս հարց է։

Այդուհանդերձ, Գ. Բադիրյանը նշել է, որ հայ-թուրքական արձանագրություններին ՀԽ-ում կողմ է քվեարկել։

-Ես կողմ եմ քվեարկել արձանագրությունների ստորագրմանը, քանի որ նրանցում չեմ տեսել որևիցե նախապայման, մանավանդ Ղարաբաղի հարցի վերաբերյալ։ Իսկ երկրորդը՝ մենք լավ գիտենք, թե լրացուցիչ կոմունիկացիաները շրջափակման պայմաններում ինչքանո՞վ են Հայաստանին անհրաժեշտ։ Եվ ինքս նաև համամիտ եմ եղել այն տեսակետն արտահայտողների հետ, որ ոչ թե պետք է սահման բացել, այլ պետք է ապաշրջափակել հայ-թուրքական սահմանը։

Կոնկրետ Հանրային խորհրդի պետաիրավական հարցերի հանձնաժողովի քննարկումների ժամանակ հայ-թուրքական արձանագրությունների վերաբերյալ տարաբնույթ և իրարամերժ կարծիքներ են հնչել, որոնք բոլորն էլ, Գ. Բադիրյանի խոսքերով, ամբողջացվել և ներկայացվել են ՀՀ ղեկավարությանը։ Քվերակությունն էլ (35 կողմ, 1 ձեռնպահ) տեղի է ունեղել ՀԽ-ի 36 անդամի ձևաչաձով։

7or.am