Ինտերնետային ծանոթությունները լայն տարածում են գտել ոչ միայն մարդկանց շրջանում, այլ նաև կենդանիների։ Գերմանական «Վիլհելմա» կենդանաբանական այգու աշխատակիցները Շտուտգարտում կազմակերպել են օրանգուտանների համար տեսագրությունների միջոցով ծանոթանալու ծառայություն։ Դրա միջոցով արդեն 2 կապիկ գտել է իր իրական սերը։ Այս մասին հաղորդում է «NBC4»–ը։

Կենդանաբանական այգու ներկայացուցիչները նպատակ են դրել զուգընկերներ գտնել Կոնի և Սինթի էգ օրանգուտանների համար։ Նրանց ցույց են տվել տեսագրություն ազատ որձ կապիկների մասին։ Տեսագրությունը նայելու արդյունքում 2 էգ կապիկն էլ ընտրել է Գեմպ անունով արու օրանգուտանին, որն ապրում է Բելգիայի կենդանաբանական այգիներից մեկում։

Որոշել են Սինթիի և Գեմպի համար հանդիպում կազմակերպել։ Սինթիին տեղափոխել են Բելգիայի «Փարի Դայզա» կենդանաբանական այգի։

«Մեզ համար չափազանց հետաքրքիր է՝ արդյոք նրանք կսիրահարվե՞ն երկրորդ հայացքից»,– ասել է կապիկների հետ աշխատող կենսաբան Մարիաննա Հոլթքեթերը։

Ընդ որում, Կոնին էլ առանց սիրեցյալի չի մնալու։ Նրան ուզում են ծանոթացնել Համբուրգի կենդանաբանական այգու կապիկներից մեկի հետ։

7оr.am