Կենտրոնի ընդհանուր իրավասության դատարանը մերժել է Նիկոլ Փաշինյանին, որպես ՀՀ ԱԺ պատգամավորության թեկնածու կալանքից ազատելու եւ հավասար պայմաններում ընտրարշավին մասնակցելու հնարավորություն տալու միջնորդությունը։

Ըստ Մարդու իրավուքների հռչակագրի եւ ՀՀ Սահմանադրության 3-րդ հոդվածի 3-րդ մասի՝ «Պետությունը սահմանափակված է մարդու եւ քաղաքացու հիմնական իրավունքներով եւ ազատություններով որպես անմիջականորեն գործող իրավունք»։ Ի լրումն սահմանադրական այս նորմի, ՀՀ Ընտրական օրենսգիրքն իր հերթին սահմանում է, որ պետությունն ապահովում է քաղաքացիների նախընտրական քարոզչության ազատ իրականացումը։ Նույն օրենսգիրքը առաջադրված եւ գրանցված պատգամավորության թեկնածուին կալանքի ձեւով ազատազրկումը նախատեսում է միմիայն Կենտրոնական ընտրական հանձնաժողովի համաձայնությամբ։

Նիկոլ Փաշինյանը ս.թ. դեկտեմբերի 5-ին գրանցվել է որպես ԱԺ պատգամավորության թեկնածու՝ կարգավիճակ, որը նրան թույլ է տալիս լիապես օգտվել Սահմանադրությամբ եւ օրենքով սահմանված իր իրավունքներից։ Այսինքն՝ իշխանությունը, առանց ԿԸՀ-ի համաձայնության դատարանի մերժման այս որոշմամբ կոպտորեն ոտնահարում է ՀՀ Սահմանադրությունն ու օրենքը։ Տվյալ դեպքում որեւէ այլ մեկնաբանություն մտացածին է ու բռնազբոս։ Այսպիսով, պաշտոնական ընտրարշավի հենց առաջին օրը իշխանությունն սկսում է ՀՀ ԱԺ ընդդիմադիր թեկնածուի նկատմամբ աղաղակող ապօրինությամբ։

ՀԱՅ ԱԶԳԱՅԻՆ ԿՈՆԳՐԵՍԻ ԿԵՆՏՐՈՆԱԿԱՆ ԳՐԱՍԵՆՅԱԿ