ԱՄՆ պետքարտուղարության պաշտոնական ներկայացուցիչ Մարկ Թոները ճեպազրույցում մեկնաբանել է ուկրաինուհի օդաչու Նադեժդա Սավչենկոյի ազատ արձակումը։

Սավչենկոյի՝ «առաջնագիծ» կամ «մարտի դաշտ» վերադառնալու հնարավորության մասին լրագրողի հարցին Թոները պատասխանել է՝ լավ կլիներ՝ ուկրաինուհին նստեր տանը, քանի որ նրա ռազմական կարիերան կարող է հարցականի տակ դրվել։

«Հույս ունեմ՝ Նադեժդա Սավչենկոն երկար ժամանակ կանցկացնի տանը՝ ընտանիքի հետ, կհանգստանա։ Նա զինվոր էր, որը հայտնվել է ճաղերի հետևում, ես չգիտեմ՝ ինչ է սպասվում նրա ռազմական կարիերային հետագայում»,–հստակեցրել է Պետդեպի ներկայացուցիչը։

Հիշեցնենք՝ նախօրեին ՌԴ նախագահ Վլադիմիր Պուտինի հրամանագրով ռուս լրագրողների սպանության գործով 22 տարվա կալանքի դատապարտված Սավչենկոն ազատվել է և մեկնել Կիև։ Նույն օրը Մոսկվա է տեղափոխվել Ուկրաինայում դատապարտված երկու ռուսաստանցի։

7or.am