Լրագրողների հետ հանդիպման ժամանակ 2007-2009թթ. Հայաստանը «Մանկական Եվրատեսիլում» ներկայացրած երեք մասնակիցներն էլ համոզմունք են հայտնել, որ մի օր Հայաստանն անպայման կհայտնվի առաջին հորիզոնականում։

-Ինձ համար կարևորն այն է, որ մեր երեխաները լավագույնս են գնահատվել իրենց քրտնաջան աշխատանքի շնորհիվ: Մեր բոլոր մասնակիցների կատարումները մոտենում են պրոֆեսիոնալիզմին,-ասել է «Մանկական Եվրատեսիլի» պրոդյուսեր Նադեժդա Սարգսյանը:

«Մանկական Եվրատեսիլում» հայկական պատվիրակության ղեկավար Դիանա Մնացականյանն էլ նշել է, որ իրենք երեխաներին մրցույթին մասնակցելու համար նախապատրաստելիս միշտ նկատի են ունենում, որ բարձր հորիզոնականներ պետք է գրավեն։

-Դրա համար նրանք մի քանի ամիս շարունակ տանջվում են, չեն գնում ամառային արձակուրդների, տանը ոչինչ չեն անում պատրաստվելուց բացի։ Նրանք առավոտից երեկո պարապում են վոկալ, սոլֆեջիո, անգլերեն, որպեսզի կարողանան հարցազրույցներ տալ, պարեր են պարում  և այլն, և այլն։ Նրանք իսկապես տանջվում են, և,  իհարկե, մենք մտածում ենք, որ այսքան տանջանքներից հետո երեխաները պետք է գնան և լավ տեղեր գրավեն, որովհետև նրանք աշխատում են իրենց ուժերի մաքսիմալ հնարավորություններով,-նշել է նա։

7or.am