-Այն լավատեսական հայտարարությունը, որ հնչեց Աթենքում տեղի ունեցած ԵԱՀԿ նախարարական գագաթաժողովի ժամանակ, երկու հիմնական շարժիչ ուժ ուներ,-«Փաստարկ» մամուլի ակումբում լրագրողների հետ հանդիպման ժամանակ ասել է «Ժառանգություն» խմբակցության ղեկավար Ստեփան Սաֆարյանն ու նշել այդ շարժառիթները։-Իհարկե, միջնորդները և միջազգային հանրությունը մշտապես լավատեսական շեշտադրումներ են անելու, որպեսզի բանակցությունները տեղից շարժվեն։ Դա նորմալ և նույնիսկ լավ է։ Երկրորդ խնդիրը, որն իմ կարծիքով բավական ազդում է, հայ-թուրքական հարաբերությունների կարգավորման գործընթացն է։ Խնդիրն այն է, որ այսօր հետաքրքրիր պայքար է գնում, թե ով է գնահատելու ղարաբաղյան հակամարտության կարգավորման գործընթացի դրական դինամիկան, որպեսզի Թուրքիան վավերացնի արձանագրությունները և կարգավորի հարաբերությունները։

 Ըստ ԱԺ պատգամավորի' տարրական տրամաբանությունը հուշում է, որ այդ հարցով Գյուլը պետք է դիմի Իլհամ Ալիևին։

-Ակնհայտ է, որ եթե հարցի հասցեատեր թողնեին Ադրբեջանին, ապա այդ դեպքում միջազգային հանրությունն իսկապես կարող էր խաչ քաշել հայ-թուրքական հարաբերությունների վրա։ Հետևաբար պատահական չէ, որ միջազգային հանրությունն ինքն է իր վրա վերցրել Թուրքիային այս հարցով պատասխանելու դերակատարությունը' ի դեմս այս հայտարարությունների, որտեղ նա Թուրքիային գրեթե հասկացնում է, որ դրական դինամիկա է նկատվում,-հայտարարել է Ս. Սաֆարյանը։

7or.am