Նոյեմբերի 30-ին ԵԱՀԿ նախարարների խորհրդի 17-րդ նստաշրջանին մասնակցելու նպատակով ՀՀ արտգործնախարար Էդվարդ Նալբանդյանը  մեկնել էր Աթենք։ Նա հանդիպում է ունեցել ԵԱՀԿ Մինսկի խմբի համանախագահներ Յուրի Մերզլյակովի, Բեռնար Ֆասիեի, Ռոբերտ Բրադկեի և ԵԱՀԿ գործող նախագահի անձնական ներկայացուցիչ Անջեյ Կասպրչիկի հետ: Այնուհետև տեղի է ունեցել եռանախագահների կազմակերպած հանդիպումը Էդվարդ Նալբանդյանի ու Ադրբեջանի արտգործնախարար Էլմար Մամեդյարովի միջև, որն ընթացել է աշխատանքային ճաշի ձևաչափով: Նույն օրը նախարար Նալբանդյանը հանդիպում է ունեցել նաև ԵԱՀԿ խորհրդարանական վեհաժողովի՝ Լեռնային Ղարաբաղի հարցով հատուկ ներկայացուցիչ Գորան Լենմարկերի հետ: Քննարկվել են ղարաբաղյան հիմնախնդրի կարգավորման բանակցությունների վերջին զարգացումները:

Թուրքական կողմի խնդրանքով Է. Նալբանդյանը հանդիպել է նաև Թուրքիայի ԱԳ նախարարներ Ահմեդ Դավուդօղլուի հետ: Այն տևել է մոտ 30 րոպե և ավարտվել առանց լրագրողների համար արված հայտարարությունների։

Սակայն, ըստ «Անադոլու» գործակալության, կողմերը քննարկել են հայ-թուրքական արձանագրությունների վավերացման ժամկետների, ինչպես նաև ղարաբաղյան հակամարտության կարգավորման հետ կապված հարցեր։

7or.am